زندءِ بندیگءِ آزمانک۔ بلوچیت کُجا اِنت؟

[Zend e Bandeeg]

آزمانک :    بلوچیت کُجا اِنت؟
زند ءِ بندیگ۔

ماہین بیگاہ ءِ وھدا نشتگ ءُ چائے وراگاہ اَت کہ ماہ گل اتک۔
ماہ گل: ہائے چونے تو ؟ تہنا تہنا چاہ وراگاہ اِے۔
ماہین: سلام ءِ دیئے زانہ ترا چے بیت۔ بیا بے نند من پہ تو چاہ کاراں۔
ماہ گل ءَ بچکندیت ءُ ماہین پہ چائے آرگا شُت۔ ساھتے رند ماہین ءَ چاہ ءُ بسکوٹ آرت ءُ ماہ گل ءِ دیما ایر کُتاں۔
ماہ گل: واہ واہ دل خوش بوت۔
ماہین: تو پرچہ مرچی کالج ءَ نئیتکگے؟
ماہ گل: تو زانے منی دوستیں ڈرامہ شپءَ کیت۔ دوشی ڈرامہ ءِ ٹیم ءَ شومیں لین شُتاں۔ من صُبح ءَ چارت۔
ماہین: توپہ ڈرامہ ءَ کالج یل دات۔
ماہ گل: چے بیت اگاں یک روچے کالج ءَ نہ شُتاں۔
ائو ماَے گاڈ  ماہین تو منا بے ہال کنااینت کہ من چیا اتکگاں اِدا۔
ماہین: تو ھر گپے تہا انگریزی ءُ اردو پرچہ ھور کنے ۔ زانہ بلوچی نہ زانے؟
ماہ گل پہ بیزاری : یکے تئی لیکچراں کُشت منا۔ پلیز لِٹ می ٹل یو سم تنگ۔
ماہین چے؟
ماہ گل: مرچی لوٹوکی اتکگاں۔ نورین ءِ سور اِنت۔ باندا شپ ھنی اِنت۔ منا ءُ ترا لوٹیتگے۔
ماہین: اے باز وشیں ھال ءِ۔ من تو لازم رواں۔
ماہ گل پاد اتک ءُ گُشتے : شر من رواں تو باند شپ تیار بومن کایاں ، منی نشار ھم مئے ھمراہ بیت۔
ماہ گل ماہین ءِ ناکو زتک اَت ءُ آئی ءِ برات ءِ دشتار اَت۔ دوئینانی لوگ کش ما کش تاں۔
دومی شپ ءَ ماہین ءَ دوچییں گُد گورا کُت ءُ کسانے دُرئے گوشءَ کُت۔ چوڈیاں دستءَ کناگا ات کہ ماہ گل ءُ نشاراتگاں۔
ماہ گل ءَ ھم چو وتی نشار ءَ میک اپ کُتگا ءُ ھمے پیم بازیں سھتءِ پِر اَت۔ ھچ زانگ نہ بوت کہ جنین چُکے۔
ماہ گل: ماہو تو اَنگت تیار نہ اِئےدیر بیت۔
ماہین: من تیاراں بِراں۔
ماہ گل پہ حیرانی : تو تیارے؟ بی بی ما سوراں روگا اِنت ، کالج ءَ نہ۔ نہ تو میک اپ کُتہ ، نہ ترا الکاپین جیولری پِر۔
ماہین: من انچو شراں منا میک اپ ءُ بازیں سھت دوست نہ بیت۔ منی گپءَ بزور تو ھم بُرو وتی دیما بوشود۔ انچو میک اپ پہ جنین چُکاں شر نہ اِنت۔
ماہ گل: ڈئیر ماہین اے فیشن اِنت۔ تو بِراں، سُورے سرا جنکاں گِندے ھیران بے۔
نشار ءَ توار کُت:  ماہ گل زوت درا اِت دیر بیت۔  دوئیناں وتی وتی چادر مانپوشتاں دیم پہ گاڈی ءَ شُتاں۔
وھدے آ بانورے لوگ ءُ شُتاں تاں دیستے کہ پیشگاہ ءَ سنبھیتگیں جنینانی دیوان اَت، ٹیپ چالو اَت، چلیم پرتنت۔  ماہ گل ءِ نشار ھمے جنینانی کرا نِشت۔ آ دوئیں بان ءِ تہا شُتنت کہ بانور ھمودا اَت، ءُ سجیں جنین چُک ھم ھما بان ءِ تہا نشتگ تاں۔ انچو کہ آ بانءَ مان بوتاں آہانی دزگہاراں آ توار کُتاں ۔ دوئیں شُت ءُ وتی دزگہارانی گوما نِشتنت۔
ماہ گل: آمنہ تئی گُد سک شوک اَنت۔
آمنہ: ماہ گل تو سک خوبصورت لگگاَئے۔
ماہ گل ءَ کندگ ءِ جت ءُ گُشت زاہر اِنت من اِنچو مھنت کُتہ۔
ماہ گل گوں دزگہاراں وشگپی ءَ ات کہ ماہین بان ءِ نندوکیں جنکاں چارگا ات۔
بانءِ یک کونڈےءَ بانورے بشانہ بستگہ۔ بانور تہایا بلے بشانہ ءِ دیمے لمب لانتگگ تاں۔  دو جنک بانورءِ دوئیں دستاں گوں ھنی ءَ نکش و نگار کناگاں تاں۔
لہتیں جنک وت ما وت کندگ ءُ مسکرآ تاں، لہتیں گوں موبائل ءَ دل گوش اَت، لہتیں چلیم ءِ کشاہ گا ات۔ ماہین ءَ دیست گیشتر جنکاں وتءَ شر سینگارتگ ءَ۔ باز کم جنک چو ماہین ءِ ڈول ءَ سادہ تاں۔  لہتیں جنکاں فیشنی گئون گورا اَت۔ لہتیں جنکانی گُشان کُوپگاں تاں۔
 ماہین جنکانی چارگءَ دلگوش ات کہ یکےءَ گُشت سالونکءِ مردوم پہ ھنی ءَ پیداکاں۔ ٹیپ اِش بند کُت۔  بان ءِ جنک کمے یک کِر بُوتاں۔
 سالونک ءِ مردوم پہ چاپ ءُ نازینک اتکاں ءُ بانورے پادئے ھنی کُتاں۔ لہتیں جنیناں بانور ءِ سرا زر داشت ءُ زرے ھارے گورا دات۔ ھنی کہ ہلاس بوت نازینک ھم بند بوتاں۔
 پدا ٹیپ چالو بوت نوں ھندی تامُرے ءِ سوت ءِ پِرا۔ گون ھمئے سوت ءَ سالونک ءِ گہار پاد اتکاں ءُ ناچ ءِ بناہ کُت۔ اہشانی گِندگءَ دگہ لہتیں جنک ھم پاد اتگ ءُ ناچءَ لگیتاں۔ نشتگیں جنک چاپ جناگاتاں۔
ماہ گل ءُ ماہین ناچے چارگءَ انچو مُشگول تاں کہ چہ کِر ءُ گورا بے سمائے تاں۔  سوت ھلاس بوت، جنکاں ناچ بند کُت ءُ نشتاں۔ ھمے وھدا ماہ گل ءِ نشار ءَ توار کُت کہ بیائے گاڈی اتکا۔
دوِئیں پا اتکاں بانورے گُہارے اجازت کُت ءُ شُتاں۔
سُورے روئگے 10 ،15 ءَ روچءَ رند ۔ یک روچءِ ماہ گُل چہ کالج ءَ اتک، دیستی کہ آئی ءِ برات ذھرزھرا نشتگ۔ ماہ گل ءَ سلام دات آئی ءَ علیک نہ کُت۔ پہ زھر گُشتی باندا چے تو کالج ءَ نہ روئے بسیں باز ونتگ تو۔ ماہ گل ھیران بوت کہ برات ءَ چے بوت۔ برات ءَ وت ماہ گل کالج ءَ داکل کُتگا ءُ مدام وانگءَ ھم کُمکی کُتگ ءَ۔
ماہ گل ءَ پہ تُرس چُست کُت: لالا پرچہ کالج ءَ مرواں؟
برات : دُورا چہ منی دیما ، منی شیتان ھراب بیت شہمات ءِ ورے۔
ماہ گل گوں گریوگی چمے وتی بانءَ  شُت ۔ آئی ءِ ھچ سر پرنہ بوت کہ برات پرچہ ذھر گپتہ آئی ءِ میار چی اِنت۔  بازیں جیڑگاں آئی ءِ سرا درد ءِ بنا بوت۔ مات ءَ ھم ماہ گل پہ نان ءِ ورگ ءِ توار نہ کُت۔ لوگ چو کبرستان ءَ ھاموش اَت۔ آ تھت ءِسرا تچک اَت و ارسِی رچاگہ تاں،  تانکہ بیگاہ بوت۔ 
ماہ گل ءَ دیست کہ ماہین پیداک اِنت آ پاد اتگ ءُ نِشت۔ ماہین کہ آئی گشءَ نشت گُڈا ماہ گل ءَ دیست کہ آ سک ملورِ انت ءُ چمی ھم چہ ارساں پُریتنت۔
ماہ گل: ماہین چے بوتءَ تو پرچہ ملورے ؟ برات پرچہ منءَ کالج ءِ روئگ نیلیت ؟
ماہین ءَ ھچ نہ گُشت ہڈک ہڈک ءَ گریوگ ءَ لگیت۔ ماہ گلءَ کہ ماہین دیست آ ھم گریوگءَ لگیت۔  ماہ گلءَ گریوگ ءَ تہا پدا چُست کُت۔ ماہین حدائے نامہ منا بوگُش چے بوت ءَ ؟
ماہین ءَ ھسکارگءِ جت ءُ گُشت: سُورے سرا باریں کیا تئی ہکس کشے تگ، پدا موبائل ءُ فیس بوک ءَ شنگ کُتہ۔ منی برات ءَ تئی ءُ وتی سانگ بندی ھلاس کُتہ۔ ماہین ءِ لونٹ سُراگاتنت بلے ماہ گل ءِ گوش بند بوتاں، آئی ءِ چماں سیاہی آرت ءُ بے سُد بوت ءُ تھتءِ سرا کپت۔

                                                           ہلاس۔
 

[jabarasKANI]

باز وش باز بھترین نبشتہ کُرتگ ۔۔۔۔۔۔۔۔۔۔۔۔۔۔ پہ چاگرد ءَ یکّ بلاہیں سوج ءُ سرپدی ے ارزیشت دار یت ۔۔۔۔۔۔۔۔
نبشتہ کن انشااﷲ سوبین بے یکّ روچے ۔۔۔۔۔۔سلامتی

[Sajjad baloch]

Baaz Vsh  , e Aazmaank yk Jowaane Kolooh eh pa Baloch Raaj ,

[Zahida Raees Raji]

تئ اے آزمانک من ءَ دوست بیت۔
منی خاندان ءَ چیزے وھد بیت کہ   موبائل ءِ سرا اکس گرگ ءُ موی اڈ کنگ ءِ سرا پابندی جنگ بیتگ۔
جنینی دیوان ءَ ما وت چُش گُرکیگءَ  مردماں چاریں تاں کسے کسی اکس ءَ گپت مہ کنت۔
اے سورانی سرا اکس گرگ ءِ تاوان بازیں لوگاں دیستگ۔ تؤ شریں کلوئے داتگ وتی آزمانک ءِ توکا۔
اُمیت انت دیمترا ھم وتی جہد ءَ برجم دارئے۔
وش ءُ وژنام باتئے

[Zend e Bandeeg]

منت واراں شمئے کہ شمارا اے آزمانک دوست بوت۔