سگریٹ
آزمانک
په شیروءَ یکێں شپ چه سالێا گێش أت. چه سر شپا به گر تاں صحبا آئیا چه هزار رنداں گێش کش بدل کۆت، بله واب نه کپت. وتا چه گؤشاں میاربار لێکگا أت. گندگا زندگیءِ مزنترێں گناهاں چه یکے کۆتگ أتی. راستیا چه شرابءِ بوتلءِ خالی کنگا رند ڈنا گامجناں آئیا سنگتانی مڑایاں رند یک سگریٹے چه آیاں زۆرتگ ۆ کشِتـَگ أت. همے که سگریٹ کۆٹ إت ۆ سنگت ئی رۆکست کۆت أنت، دلا هِٹـِّرے گۆشت ئی ۆ لۆنٹا جایاں دیم په لوگا چهر ئی کۆت. دروازگءِ دپا آ آتک ۆ مێه بوت. دست ماں کسگا أت، بله چابی چه آئیءِ کیسگا درایگا نه أت. "کلام به جنت، شومیں دلا؛ همینچۆکا دارگ نه بوت" آئیا وتی یله دلی ڈؤبار إت ۆ گوں کؤٹءِ کیسگا أڑاں بوت "یکے إے کیسگا هم غوثءَ جتگ چنچۆک جۆهْل إنت، کلدارے مان ئی نیست، یکێں چابی إنت که کس نه زانت کۆجا کۆنڈا کپتگ."
په هیلـّـتے چابی ئی درگپت، دروازگ ئی پاچ کۆت ۆ لوگا پۆتِرْت. دستمؤش کناں بتیءِ بٹن ئی درگپت ۆ روک ئی کۆت. دیوانجاه راهءِ سرا أت. دیست ئی که شرابءِ هورکێں بوتل، گلاس ۆ دگه بازێں گسڑ کپتگ أنت؛ ألبت، آئیءِ واک هما یکێں سگریٹا بۆرتگ أت. پمیشا مۆدامی ڈولا دیوانجاهءِ گسڑاں سرجم کنگ ۆ رێچگءِ بدلا آئی تچکا دیم په وتی وابجاها شۆت.
شپا بێوابیا گوازێنگا رند صحبا گوں گژتـَگێں چماں چست بوت، آپ ۆ چاهے ورگا نشت، ۆ وتی دوشیگیں حالءِ سرا فکر جنگا لگ إت. دلا خیال ئی کۆت که ساریا روچے ده تاں بیست دانگ سگریٹ ئی کشِتگ؛ په یک سگریٹے کشگا هنـّی وتا چنچۆک میاربار لێکگا إنت. "إنچۆک میاربار وا په وتی مقصدانی پیله کنگا مردۆماں کؤشارێنوکێں سیاستکار هم وتا نه لێک أنت" بلوچستانءِ همۆک روچ کۆشگ ۆ چگل دیگ بیتگێں جسدانی ترانگا کپت ۆ دلا جێڑ إت.
رندترا چه بلوچستانءِ سیاسی جێڑواں وتی مغز ئی چهر دات ۆ دلا خیال ئی کۆت که سگریٹا یله دیگا ساری آ چنچۆک نِگوَم بیتگ. زر زوال بیتگ أنت، دپ مۆدام چۆ کۆچلا بیتگ، پۆچاں بو کۆتگ، راها روان تۆه کناں بیتگ؛ هنچۆش که چیپۆکے چورْت جنان کنت. إیشانی کشا ڈنبێں نادراهءِ وڑا مۆدام کئو کئو ئی بیتگ. هزار جۆهد ۆ توجیلا رند سگریٹ ئی یله داتگ. آئی درمانجاهءِ کوّاسانی سواجانی ترانگا کپت که گۆشتگ أتش"یله دیگا رند أگر سگریٹی پدا یک دانگے به کشـّیت، کـَشـّگءِ سلـّێں هێلا پدا چنـْت" پمیشا چاها وراں دست ئی بۆزاد بۆرت أنت ۆ دعا ئی لوٹ إت "شالا چه إے سلگتێں نشوا به رکـّاتوں!"
