تُنّاپیں تْران ئے سْیاہگ
منظور بسمل
واجہ س۔ آزات ئے کتاب ''تُنّاپیں تْران'' من پد مں پدا دو رندا ونت۔ تُنّاپیں تْران چہ بلوچی زبان ئے ہما حسابی کتابان اِنت کہ وہد پہ وہد وانگ کرزنت۔ چرے کتاب ئے وانگا وانوک ہمینچو دربارت و فہمیت کہ سداں کتاب بوانیت۔
تُناپیں تْران ئے شاہگان بومیں نبشتانک شاہد اَنت کہ واجہ باز وانوک و کم نبشتہ کنوکیں جْوانیں نبشتہ کارے، مئے دزبندی گوں واجہا ہمیش اِنت کہ وتی لبزانکی سفرا جاری بکنت، شعر و رَم، ہردُکاں وہد بہ دنت کہ ''وہد'' واجہ ئے مہرانی مُہتاج اِنت۔
تُنّاپیں تْران ئے کُلّی شانزدہ نبشتانک انت، یک دْراجیں لچہے ''شائر و ارواہ'' و یک نمدی ے کہ واجہا محسن بالاچ ئے نمدی ے ئے جوابا نبشتہ یے کتگ۔
اے کتاب ئے ہر نبشتانک و چمشانک وتی مٹّ و دَرور وت اِنت۔ شائر و ارواہ وتی دورئے ''ماسٹر فیسے''
تُنّاپیں تْران ئے مستریں جْوانی اِش اِنت کہ زبان و بیان ئے سرا واجہ ئے گِرفت سک مُہکم اِنت۔
بلوچی ئے تہا رَم یا نثرئے اے رنگیں روان و شائستہیں زبان باز کم نبشتہ کارا نصیب بیت۔
واجہ شَے رگام و واجہ س۔ آزات ئے کتاب زبان و بیان ئے حسابا بلوچی ئے گچین گنج اَنت۔
واجہ آزات ئے زبان انچو رِچوک و روان اِنت کہ گْران گْرانیں سرحالاں انچو بیان کنت کہ پہ وانوکا ہچ ڈولیں جیڑہے ودی نہ بیت۔
تُنّاپیں تْران ئے بازیں نبشتانکانی تہا دری زبان انچو ترجمہ {رَجانک ئے اِصطلاحا واجہ نہ منّیت} کنگ بوتگ انت کہ ہچ رنگا گُمان نہ بیت کہ اے گالرِد چہ دری زبانی٘ا زُورگ بوتگنت۔
اگاں واجہ ترجمہ ئے نیمگا دلگوش بہ دنت گوں، ہم پہ بلوچی زبانا وشبہتی یے بیت۔
راستیِا لوٹئے منی وس ئے بال اینچو نہ اِنت کہ من واجہ ئے نبشتانکاں ریس و پرّیس بہ کناں۔ اے کارا پہ آیوکیں وہدئے زانتکاریں نگدکاراں یلہ کنیں۔
اے نبشتانک ئے تہا من چَڑو واجہ ئے سْیاہگ ئے بابتا چنگامارو جناں، بگندئے بلوچی زبان ئے راست نبیسی ئے دِیریگیں، مانگیِشّتگیں اَڑ و جیڑہے بہ گیِشّیت۔
اے سیاہگ ئے ناما اگاں ما ''آزات سیاہگ'' بہ کنیں تہ رَد نہ بیت۔ اِشیئے دو سبب اَنت، یکے اے کہ اے سیاہگ چہ بازیں گِر و بندا آزاتیں سْیاہگے کہ اشی ئے وانگ و نبشتہ کنگا لس وانوک و نبشتہ کار ہچ جنجال نہ بیت۔ دومی ہبر اے کہ اے سیاہگ ئے سرا واجہا دلجمیں کارے تُنّاپیں تْران ئے گونابا پہ بلوچی ئے گاریں وانوکاں کتگ۔
تُنّاپیں تران ئے وانگا پد وانوک تُنّیگ بیت، کولء واجہ بلوچانی ہاوند آئیے کلما چد و گیشتر تاگت و تَوان بہ دیات۔
عربی سیاہگ ئے سرا چوناہا ہچ رنگا پہربندگ نہ بیت کہ بلوچی زبان ئے راست نویسی ئے اڑ و جیڑہاں گیِشّینت کنت۔ بَلہ ہرکس کہ وڑے نہ وڑی٘ئا جُہدا اِنت تہ بائد آ ڈالچار کنگ مہ بنت۔
اے درگتا ہرچی کہ واجہا گوں وتی ''ٹُولیِا'' جَکانسری و جفاے کتگ، آ چارگ و چکّاسگ بہ بنت۔
''سْیاہگ و راست نبیسی'' چو ای٘دگہ سائنسی زانشتان اَنت کہ اِشانی سرا کار ہچبر آسر نہ بیت، اے کار وہد پہ وہد نو٘کازگ و درارگ بنت، چیا کہ انسان چَہ گِہا گہترئے نیمگا روان اِنت۔ زانشتی کارانی ہچ تک و پہنات چو اوشتوکیں آپا نہ اِنت کہ شُونز بہ بندیت یا آسر بہ بیت۔
من وتی اے ''نِبشتُک'' ہم پہ لس وانوکاں ''آزات سْیاہگا'' نبشتگ، بلہ اِشیئے تہا ہرکجا کہ من گوں واجہا ہمتپاک نہ بُوتگاں اُودا کمو گیشی کُتگ، اُمیت اِنت کہ واجہ و بلوچی ئے وانوک منا دَرگْوز کننت۔
نُو ما کائیں وتی سرحال ئے نیمگا۔
کُلْاں پیش من آزات سیاہگ ئے الف بے آں نبشتہ کناں۔
ا۔ ب۔ پ۔ ت۔ ٹ۔ ج۔ چ۔ د۔ ڈ۔ ر۔ ژ۔ س۔ ش۔ ک۔ گ۔ ل۔ م۔ ن۔ و۔ ھ/ہ ء ی ے.
آزات سْیاہگ ئے تہا چندے آب کہ لی٘پگ کنگ بوتگ، آ اِش اَنت: ث۔ خ۔ ذ۔ ڑ۔ غ۔ ف۔ ں۔
اے ہما آب اَنت کہ وہد پہ وہد سْیاہگ و راست نویسی ئے سرا کار کنوکاں گی٘ش کنان کتگ انت۔
اے لیپگ کتگیں آبانی تہا کم چہ کم 'خ' و 'ف' بائد دؤر دیگ مہ بوتین انت، چیا کہ رخشانی و سلیمانی دو ہزار گنجیں گالوار و بولیانی تہا اے آب باز کارمرد بنت و دوئیں گالوارانی پجّار اَنت۔
برے برے انچو گُمان بیت کہ آزات سیاہگ تہنا پہ رخشانی و مکرانی گالوارانی جہگیریِا سازگ بوتگ۔
آزات سْیاہگ ئے تہا ءَ ۔ ءِ ۔ ءُ چہ بُنء ہُنڈالا ولگْوج کنگ بوتگنت۔ 'ءَ' ئے جاہا 'الف' و 'آ' زُورگ بوتگنت،
اے درگتا من 'ء'+'ا'= 'ئا' ئا دیما کاراں کہ اے باز جاہا کار دنت چو کہ: 1966ئا، عطائا، وفائا،۔۔۔
'ءِ' و 'ئے' ئے بدلا 'ئے' زورگ بوتگ۔ 'ئِے' ئے جاہا 'یَ' گچین کنگ بوتگ کہ مُردنی ئیں باز جاہا وانوک و نبشتہ کارا بَہہ و بِکّڑ کنت۔ منی سَلا اِش اِنت 'ئِے' ئے جاہا 'یے' زورگ بہ بیت، چیا کہ چریشیِا ہچ کار گرگ نہ بوتگ۔ 'ی' دگہ باز جاگہا کارمرز بیت، پمیشا اے جاگہا کارمرد کنگ مہ بیت۔
آزات سیاہگ ئے تہا دگہ نزوری اِش اِنت کہ 'و' و 'ی' ہرکُجا کہ لبزانی نْیاما کاینت الّم 'ء' (ہمزہ) گون اِنت۔ چو کہ: رئوان۔ مئوج۔ کئواس۔ کئوانٹ۔ رئواج۔ دئور۔ ڈئول۔ چورئویں۔ ھئیوان۔ مئولانا۔ کئوم۔ بارئوا۔ شئوکا۔ تئوار۔ نئوبت۔ گئوس۔ رئوگ۔ ھئور۔ پاھئو۔ گئوھر۔ نئوکر۔ پئوج۔ کئیپسول۔ تئوام۔ سئوت۔ کلئو۔ کئوار۔ جئوزہ۔ سئوب...
ھئیال۔ بئیوک۔ بئیگا۔ مئیار۔ رئیڈیو۔ تئیار۔ ھئیر۔ نئیلیت۔ کئیت۔ بئینت (بَیَنت۔بنت) زئیمیئے۔ ھُسئین۔ کئیمپ بئیرک۔ کئیپ۔ تئیی۔ مانمئیاتک و دگہ بازین۔۔ اے لبز بے ہمزہا جْوانتر انت چو کہ روان۔ موج۔ کواس۔ کوانٹ۔ رواج۔ دور۔ ڈول۔ چورویں۔ ھیوان۔ مولانا۔ کوم۔ باروا۔ شوکا۔ توار۔ نوبت۔ گوس۔ روگ۔ ھور۔ پاہو۔ گوہر۔ نوکر۔ پوج۔ کیپسول۔ توام۔ سوت۔ کلوہ۔ کوار۔ جور۔ سْوب۔ جْوزہ۔۔۔
ھیال۔ بیوک۔ بِیَگا۔ میاریگ۔ ریڈیو۔ تیار۔ ھیر۔ نیلیت۔ کیت۔ کیمپ بَیَنت۔ زیمی ئے۔ حسین۔ بیرک۔ کیف۔ تئی۔ مانمیاتک۔۔۔
انچو گُمان بیت کہ اے 'برنامہ' (softwere) ئے نزوری ے۔
پہ زبانے ئے سْیاہگ ئے راست نبیسیِا کہ برنامہے جوڑ کنگ بیت تہ بائد ہما آسْراتی یے مان کنگ بہ بنت کہ راست نبیسی ئے ڈَکّاں گپت بہ کنت۔
اگاں من بہ گُشاں 'عربی سیاہگ' ئے کُلّیں برنامہ نیمبُندگ اَنت تہ مہ گُش دْروگ، چیا کہ تنیگا کمپیوٹر عربی سیاہگا دربُرت کنگا نہ اِنت۔ عربی سیاہگ ءِ اعراب و اے دگہ ٹِکّ و نشان کہ آبانی سرا مانکاینت، آیاں کمپیوٹر فہمگا نہ اِنت، پمیشا ما گُشت کنیں کہ عربی سیاہگ پہ کمپیوٹرا مانگِیشّتگ و مُردگیں سْیاہگے۔
'ی' کہ پہ third person singular ئے گِیشینگا زُورگ بوتگ، وانوک و نبشتہ کنوکا مانگیِشّینیت۔ چو کہ:
''منا 'سکینی' دات و گوں من بوہیری 'کُمکی' کت''
''سرھال یا بُنگپ 'بِلّی' کہ پہ شائریا الّمی انت''
''چہ کراچیا 'لانکی' بستگ و آتکگ ''زیدا'' بنگ و بروت اِنت و نشتگ و 'دیوانی' کتگ''
''پہ چاپ و شنگا آورتگ 'اتنتی' ''
''دلانی تہا پُترتگ و دلانی 'ھالی' گپتگ''
''سرمچارانی 'راھی' گپتگ''
''اُستادے ئے ڈولا سر و 'سوجی' کُت و 'کاریَ' گپت''
اگاں اے لبز چو بہ بنت گہتر اِنت:
''سکین یے دات''
''کُمک یے کت''
''بِلّ یے کہ''
''لانک یے بستگ''
''دیوان یے کتگ''
''دلانی ھال یے گپتگ''
''سرمچارانی راہ یے گپتگ''
''سر و سوج یے کت و کاریے گپت''
''تھرڈ پرسن سیِنگولر''ئے گیِشّینوکیں آب 'ی' ئے بدلا 'یے' بہ بیت تہ سیاہگ ئے مانگیِش کمتر بنت۔
آزات سیاہگ ئے دگہ مانگیِشے اِش انت کہ کم و گیش دْراہیں لبز گوں کُمک گالاں ہوار نبیسگ بوتگنت، چریشیِا وانوک و نبشتہ کنوک گیشتر مان اَڑنت۔ پہ درور :
ننندنت، (نہ نندنت) بداتیننت، (بہ داتین انت) کنی٘ت، (کن اِت) نئیئیت، (نہ ئیت یا نئیت) بوتیننت، (بوتین اَنت) گیدییئے، (گیدی ئے) یاگیین، (یاگی ئیں) مبوتی٘نتنت، (مہ بوتین اتنت) رُمایینیت، (رُمائینیت) انچای٘ن، (انچائیں) بھای٘ن، (بہائیں) سرپد اۓ، (سرپدئے) گلاییت، (گلائیت) بزانی٘ت، (بزان اِت) کنِت، (کن ات) کئیی، (کئی) کناینتنت، (کنائینت انت) دَرزیین، (درزی ئیں) مَپرّامت، (مہ پرّام اِت) بگواریتنت، (بہ گْواریت اِنت) نکئیتنت، (نہ کیت اِنت) داریتنت، (داریت اِنت) گُشیتنت، (گُشیت اِنت) کنتنت، (کنت اِنت) زیباییئے، (زیبائی ئے) دیمئیی، (دیم یے) ھدامرزیین، (حدامُزی ئیں) بچنڈینِت، (بہ چنڈین اِت) بِلیکی٘ت، (بہ لیک اِت) نہ ای٘ت، (نہ اِت) بیایی٘ت، (بیا اِت) لھڈیین، (لہڑی ئیں)
}روان اِنت{
