🍁 ماسگ 🍁
نبشتہ کار: الی جُمّا زامرانی
بلوچ راج ءِ چاگرد ءُ دود ءُ ربیدگ باز جوانیں رھبندانی سر ءَ کاربند انت ءُ ما بلوچ راج وتی دود ءُ ربیدگانی سر ءَ پھر ءُ شان کنیں مئے دود ءُ ربیدگانی ستا ءُ وزبت ءَ اے دگہ راج ھم کن انت چوشکہ مئے بلوچ راج ءِ مھمان جلی ءُ مھمان نوازی کمک ءُ مدت ءُ میار جلی ءُ سور ءُ آروس ءُ گد ءُ پچ ءُ پوشاک ءُ گیرت ءُ رھمدلی ءُمزن ءُ کسان ءِ ازت ءُ دور چاری ءُ راجکاری
بزاں ھشر ءُ اے دگہ رواج گپتگیں مئے دود ءُ ربیدگ انت کہ ھنوگیں وھدءَ واٹساپ ءُ پیس بک ءُ اے دگہ رسانکدرانی تہ ءَ مردمانی بنگپ ءُ سرھال انت من ءَ مئے بازیں مھربانیں دوست ءُ واجھاں وتی وتی واٹساپی دیواناں ھور کتگ کہ لھتیں دیواناں جوانیں سرھالانی سر ءَ گپ ءُ تران بیت یک روچے مئے زامران ءِ شمبے زھی دیوان ءَ واجہ ڈاکٹر نیسر اھمد ءَ سرھالے ایر کتگ ات کہ ماسگ چون بندگ بیت ءُ ماسگ بند ماسگ ءِ بندگ ءَ رند چون آئی بزانتاں گوش ایت ءُ آئی وت ماسگے بستگ ات ءُ دیوان ءَ اکس ےءِ راہ داتگ ات کہ اے ماسگ ءِ بزانتاں بگوش ات سرھال مرچی ماسگ ءِ سر ءَ انت, شمبے زھی دیوان ءَ مدام جوانیں سرھالانی سر ءَ گپ ءُ تران بیت ءُ واجہ شے ملا ابد رشید ءُ واجہ ڈاکٹر رھمدل ءُ واجہ الیاس ء میر لال مھمد, واجہ مھمد اسلم آسکانی ءُ واجہ ھاجی ابدل گنی ء واجہ جان مھمد ءُواجہ ڈاکٹر نسیر اھمد ءُ واجہ میر انور ءُ واجہ ھاجی مندوس ءُ واجہ ھاجی براھیم ءُ واجہ ملا ابدل باکیءُ واجہ مھمد آلم ءُ دگہ بازیں واجھے سرھالانی سرءَ بھر زورایت ءُ وتی ھیال ءُ لیکھاں درشان کن انت اے سرھال ءَ درستاں وتی گپ ءُ تران کت انت ءُ واجہ شے ملا ابد رشید ءُ اے دگہ واجھاں گوشت کہ واجہ ڈاکٹر رھمدل ماسگ ءِ وڑ ءُ پیم ءُ بزانتاں جوانی ءَ سرپد اِنت ءُ دومی واجہ شے ملا رشید ھمک سرھالانی سر ءَ جوانی ءِ سر ءَ گپ جنت ءُ ھما, بنگپ ءِ مجگ ءُ ریشگاں درگیج ایت ءُ ھمے پیم ءَ واجہ ڈاکٹر نسیر اھمد ھم جوانی ءَ سرھالانی سر ءَ گپ جنت ءُ بازیں جوانیں سرپدی دنت بلے اے روچ ءَ اے سرھال درستاں واجہ ڈاکٹر رھمدل ءِ سر ءَ داتگ کہ شما اے بارو ءَ بگوش ات کہ ماسگ چون بندگ بیت ماسگ بند چون آئی بزانتاں گوش ایت ءُ ماسگ ءِ بندگ ءِ رھبند چون انت, واجہ ڈاکٹر رھمدل ءَ گوشت کہ من ماسگ بندے نہ آں بلے من ماسگ بند پہ ماسگ ءِ بندگءَ دیستگ انت ءُ لھتیں جاھاں ھما وڑ ءَ ماسگ بند ءَ ماسگ بستگ ءُگوندوےءِ داتگ ءُ پد ءَ گوشتگ ےءِ ھما پیم ءَ بوتگ بلے ماسگ ءِ بندگ شِرک انت ءُ نیکراھی اے چیزاں رَد کنت چےءَ کہ باندات ءُ گیب ءِ ھبراں پاکیں ھاوند زانت ءُ دومی باز ماسگ بند ماسگ ءِ بندگ ءِ وھد ءَ ماسگ ءَ اے پیم ءَ گوندو دینت ءُ گوش انت کہ ھنچیں ماسگے بات ئے کہ بی بی پاتمہ ءَ پہ مھتر الی ءَ شیر بستگ یا ھنچیں ماسگے بات ئے کہ بی بی پاتمہءَ پہ ھسن ءُ ھسین ءَ بستگ ءُ ماسگ بندانی اے گپاں ھچ راستی نیست انت ءُ اے گپ چَٹ ءَ دروگیں گپ انت چے ءَ کہ بی بی پاتمہ ءَ نہ پہ مھتر الی شیر ءَ ماسگ بستگ نہ پہ ھسنءُ ھسین ءَ بستگ ءُ نیکراھی ءِ تہءَ اے درست شِرک ءِ تہ کاینت دگہ لھتے گوش ایت کپر انت بلے شِرک ءُ کُپر ءِ جتائیں بزانت انت شِرک ھما چیز ءَ گوش انت کہ پاکیں ھاوندءِ ھمراھی ءَ دگرے ھمگرنچ بہ کن ئے ءُ کُپر ھما چیزءَ گوش انت کہ گوں پاکیں ھاوند ءِ زات ءَ انکاری بہ بئے ھنچوشکہ من برزءَ گوشت کہ نیکراھی اے چیزاں رد کنت ءُ ماسگ ءِ بندگ شرک انت پمےھاترءَ شرک انت کہ ماسگ بند ماسگ ءَ گوندو دنت ءُ گوش ایت کہ تو ئے پیش بگوش کہ پلان کس ءِ کار بیت یا نہ بیت یا پلان کس گار ءُ بیگواہ انت آ در کپ ایت یا زندگ انت یا بیران بوتگ ءُ سکی ءَ گپتگ یا پلان مردم ءُ مھلوک کاروانی ءُ مساپریءَ شتگ انت وتی مِنزلءَ کدی سر بنت ءُ کدی واتر بنتءُ چنت روچ آیاں مساپریءِ تہءَ گوازین انت یا پلان کس اے کار ءَ کنت یا نہ کنت یا پلان کس ءَ اے کار کتگ یا نہ کتگ یا پلانی زاماتی بیت گوں پلانیءَ یا نہ بیت یا پلانی آروسی گوں پلانیءَ بیت یا نہ بیت یا پلانی پہ پلانی ءَ وتی گوجار ءَ کارایت یا نہ یا پلانی ءِ جنین ءِ چک مردینے یا جنینے یا, پلان مردم اے کار ءَ بنگیج کنت سوبمند بیت یا نہ بیت اے درستیں ھنچیں گپ انت کہ پاکیں ھاوندءِ پاکیں زات زانت کہ باندات چے بیت بلے چون کہ سرھال ماسگ بندگ ءُ رھبند انت کہ چون ماسگ بندگ بیت چون گوندو دینت ءُ چون بزانتاں گوش انت, واجہ ڈاکٹر رھمدل ءَ ماسگ ءِ بارو ءَ جوانیں چمشانکے دات کہ آیاں من ھمیش شمئے دیم آرگ ءَ آں,
نوں کائیں سرھال ءِ نیمگ ءَ کہ ماسگ چون بندگ بیت, ماسگ ءِ بندگ ءَ چے کارمرز بیت ءُ چون گوندو دیگ بیت,
پیسرءَ ما ماسگ ءِ رھبند ءَ گوش ایں کہ ماسگ بند چے گوش انت کہ ماسگ ءِ پیش چونینے بہ بیت آیانی گوشگ انت کہ ماسگ ءِ پیش ھنچیں پیشے بہ بیت کہ آ پیش ھچ کس ءَ دست نہ جتگ ءُ ھچ دلوت ءُ ھچ مردم ءَ گْورمُوش نہ داتگ دومی پیش دازے بیت یا پُرکے بیت یا مچی پیشے بیت بلے ماسگ ءِ پیش نہ کنارہ ءِ پیشے بہ بیت نہ گَرگ ءِ پیشے بہ بیت نہ پیسر ءَ بُراتگیں ءُ کپتگیں پیشے بہ بیت بلکیں نیام ءُ درمیانی پیشے بہ بیت کہ ھچ کس ءَ گورمُوش ءُ دست نہ جتگ , ماسگ بند آ پیش ءَ تُک کنت ءُ کسان کسانیں تُک ءُ ٹال کنت ءُ دگہ ماسگ بند ماسگ ءَ رولہ بزاں روزرد ءُ روچ کپگ ءُ ایر روگی ءِ وھد ءَ بند ایت ءُ ماسگ بند وتی دیم ءَ گوں روچ ءَ کنت ءُ ماسگ ءَ گوندو دنت ءُ بند ایت,
ھنچو کہ آ وتی دیم ءَ روچ ءِ نیمگ ءَ کنت ءُ پد ءَ ماسگ ءَ اے پیم ءَ گوندو دنت ءُ گوش ایت کہ
توئے ماسگ بگوش کہ اے کار اگاں بیت تئیں ماسگ. سئے سر ءُ پُلیں جَتی یے بات ئے یا چارسر ءُ پلیں مستاگے بات ئے اگاں اے کار نہ بیت گُڑا پنچ سر ءُ گٹے بات ئے یا ھُشکے راھے بات ئے,,
ماسگ ءِ بندگ ءَ رند ماسگ اگاں سئے سر ءُ پلیں جتی یے بوت یا چار سرءُ پُلیں مستاگے بوت ماسگ بند گوش ایت ماسگ وش انت سئے سر ءُ پُلیں جتی یے باز وش انت ءُ پلیں مستاگے بوت گُڑا وشیں ھالے کیت, اگاں ماسگ پنچ سر ءُ گٹے ءُ پیش مانگیش اتگ انت گُڑا ماسگ وش نہ انت اگاں پیشانی درستیں سراں یک دومی ءَ گرھن وارتگ ءُ اے سر ءُ آسر پچ انت گُڑا بزاں ماسگ ھشکیں راھے, نوں کائیں ماسگ ءِ پیشانی نیمگ ءَ کہ سئے سر ءُ پُلیں جتی ءُ چار سر ءُ پلیں مستاگ ءُ مستاگ چے ءَ گوش انت جنازہ ءِ دروشم ءُ سلامتی ءِ نشانی چے گوش انت !!!!!
سئے سر ءُ پُلیں جتی ھمے ماسگ ءَ گوش انت کہ سئیں تاک پیشاں ءَ گرھن وارتگ ءُ چو دْرنگ ءِ وڑ ءَ انت ءُ دگہ دو پیشءَ یک سرے گرھن وارتگ ءُ دومی سراں گرھن نہ وارتگ ءُ پچ انت ءُ یک پیشے ایوک انت اے ماسگ ءَ سئے سر ءُ پلیں جتی گوش انت, اگاں چار پیشءَ یک دومی گرھن وارتگ ءُ دو پیش ءَ اے سرءُ آ سر ءَ گرھن وارتگ ءُ چو گوری مَدگ ءِ دروشم ءَ اِنت اے ماسگ ءَ چار سر ءُ پلیں مستاگ گوش انت, مستاگ ءِ بزانت وشیں ھال ءُ یک مَدگے ھست کہ آئی ءَ گوری مدگ ھم گوش انت ءُ مستاگ ےءِ گوش انت اے مدگ وھدے یکےءِ سرءَ بہ نند ایت یا یکے ءِ لوگ ءِ دپ ءَ بئیت ءُ بہ نندایت گوش انت اے مدگ ءَ وشیں ھال ءُ مستاگی یے گون انت ھمے پیش کہ چو مدگ ءِ دروشم ءَ گرھن وارت ھمے ماسگ ءَ پلیں مستاگ ءِ نام بندگ بوتگ کہ مستاگیں مدگ وشیں ھالانی آروک انت
دگہ برے برے ماسگءِ پیش یک دومی ءَ ھنچو گرھن ور انت کہ مانگیش انت ءُ ھچ پچ نہ بنت اے پنچ سر ءُ گٹیں ماسگے کہ وش نہ انت دگہ ماسگے کہ پیش دو دو سری گرھن ورانت آیانی دروشم چو جنازہ بیت اے ماسگ ھم وشیں ھال ءِ ماسگ نہ انت دگہ ماسگے کہ یک یک پیشے گرھن وارت چو سواس ءِ دروشم بنت گُڑا گوش انت اے ماسگ وش انت اے مردءِ سواس انت بزاں زوت لوگ ءَ کیت سر بیت یا دگرے آئی ھال ءَ کار ایت,
دگہ ماسگے کہ پیشاں یک ءُ دومی ءَ گرھن وارتگ بلے اے سر ءُ آ سر ءَ گرھن نہ وارتگ گوش انت ھشکیں راھے اگاں درستیں پیشاں گرھن وارتگ یک پیشے ءَ گرھن نہ وارتگ ءُ ایوک انت اے ایوکیں پیش سلامتی ءِ نشانی انت,
ماسگ ءَ ھمے پیم ءَ ماسگ بند گوندو دینت ءُ بند انت برے برے ماسگ بندانی گپ ءُ ھبر راست بنت بزاں چو کور ءَ لَٹءَ بنت مردم لگ انت مردم ھمے ماسگ بندانی ھبراں باور کن انت ءُ وتی دل ءُ دماگ ءِ تہ ءَ ھمے گپ ءَ جاگہ دینت کہ اے کار ماسگ ءَ کتگ اے ھال مارا ماسگ داتگ بلے چو نہ انت نہ کہ ماسگ بند ءَ گوں ماسگ ءَ روھانی تلسمے ءَ ھمگرنچی یے ھست انت نہ کہ آئی جند ءَ روھانی شُبین بیت ماسگ بند چہ وتی نیمگ ءَ وت وت سریں گپ کنت بلے گیب ءُ باندات ءِ ھبر ءُ ھالاں پاکیں پرودگار ءِ زات زانت انت پمشکہ ماسگ ءِ بندگ شِرک ءُ گناہ انت,دیم ءَ ارادہ انت کہ آس ءُ نال ءُ بند ءُ تائید ءُ سھر ءُ جادو ءِ سرھالانی سرءَ نبشتہ بہ کناں گُڈسر ءَ ھمے گوش آں کہ باید انت مردم وت ءَ چہ اے وڑیں چیزاں دور بدارانت کہ گناھگار مہ بنت دوا انت کہ پاکیں پرودگار مارا ءُ شمارا نیکیں کارانی کنگ ءِ ھمت ءُ ھاٹی ءَ بہ دنت ءُ مئے ءُ شمئے تہ ءَ ھوری ءُ تپاکی یے بئیت ءُ ما ءُ شما وتی ڈیھ ءِ واھند ءُ مستر وت بات ایں ھنچوش بات ,,
*
