Author Topic: پندولءِ حق- آزمانک: ولید گربنی  (Read 2727 times)

0 Members and 1 Guest are viewing this topic.

Offline Noora baloch

  • Content Contributor
  • ****
  • Posts: 106
  • Karma: 6
  • MahRang E Mahen Darweer Beya Katrahe Dil a Dae....
پندولءِ حق- آزمانک: ولید گربنی
« on: January 02, 2009, 02:25:59 PM »
پندولءِ حق- آزمانک: ولید گربنی
إے آزمانک 1990‏ءِ دھرا ماھتاک بلوچی لبزانکءَ شنگ بیتگ۔ إدا لھتے گال، گالبند و نبشتہ کنگءِ راھبند مٹـّينگ بیتگ أنت۔ قصہ پھک خیالییے إنت۔ بلے گون راستیا نزیک بیگءِ سببا بیت کنت کہ گون لھتے کسانءِ زندا أیشیءِ گپان نزیکی بہ بیت، پمیشا چہ ھماوان پھلـّی لوٹان۔ ولید

شھداللہ ھمے دنیاءِ مردمے أت، چہ آسمانءَ إیر نیاتکگ أت۔ ألبت آئی چہ دنیاءِ توکا آیوکین ھر روچی بدلیان بے تماہ أت۔ کش گورءِ شھران کار و روزگار باز أت۔ ھر کس وتی پت و پیرکی مچ، ڈگار و مڈ ّیان رَنبینگا أت و شھران رَوَگا أت۔ ھزارانءِ حسابا زر کٹـّگا إتنت۔ بلے شھداللہ گون وتی چنڈ ڈگار و چارین بن کـُروچان راضی أت۔ کـَشا آئیا لھتے پس ھم ھست أت۔ دوئین بچگ ئی کلـّگءِ مدرسوا وانگا إتنت۔ کتاب و وانگ مفت أت۔ أبید چہ قلم و کاگدان گيئشترین خرچے سرا نیست أت۔
شھداللہءِ کسانترین برات شیردل ھم دراتکگین مردمانءِ رما گون وتی جن و چکان شھرےءَ شتگ أت۔ کلـّگءِ تھا شھداللہ چہ وتی نزیکین مردمان یوکا پشت کپتگ أت۔ لھتے بلوچ نندوک إتنت، بلے آوان ھچ بروسہ نہ أت۔ کجام وھدا پہ مالانءِ چارینگا بار إش کت و بلوچیءَ شت أنت۔ آوانءِ مال مڈی یک گِدانے أت۔ چدا چست کنگ و دگہ جاھے لک کنگا إیشیا مزنین توجیلے پہ کار نہ أت۔ جاہ منندین دھقانانءِ سوب أت۔ مردمانءِ درکپگا رند آوان کلـّگءِ ملک و نیبگ پہ کلندوی زرتگ إتنت۔ ھمشانءِ ثمرانءِ ورگا لاپ إش سیئر أت۔
شیردلءِ لوگا چہ مرچیءَ دوازدہ سال پیسر جنکے ودی بیتگ أت۔ شھداللہ ودی بیگءِ درگتا جنک پہ وتی مزنترین بچک قادوءَ دست گپتگ أت۔ براتا نشانگ ھم زرتگ إتنت۔
ھنون کہ شیردلءَ کلـگءِ بدلا شھر وتیگی کتگ أت، دوئین براتانءِ نیاما گند گدارءِ مزنترین عدز ھمے سانگبندی أت۔ پمیشا سئے یا چار ماہءِ سرا شھداللہءَ ناہءِ پاچُکے چہ وت کت و زکـّے ملکی روغن یا تشے ترّین شیلانچ چہ بلوچان بچ گپت، چادرءِ لمبا بست أنت و شھرءِ نیمگا راھی بیت أت۔

چہ کلـّگا شتگ و شھران جاہ منندین مردم برے برے پہ وتی مچ و ڈگارانءِ چارگا و یا ترّتابا کلـّگا آتک أنت۔ إیشانءِ جاگہ شھداللہءِ لوگ أت۔ شپان تا وھدے نشت شھری زندگیءِ آسودگین حال إش بیان کت أنت، بلے پہ إے وشیان شھداللہ و آئیءِ کنبءِ مردمانءِ دل تشے ھم نہ شوکـّـُر إت۔ أنگہ وتی لانءِ تھا شھری مردمانءِ أبدالیءِ سرا کند إت إش۔
ھمے سلسلوا پنچ سال کبل بیت۔ نون قادوءَ ھشتمی کلاس دربرتگ أت۔ چدا دیمتر کلـّگا وانینگ نیست أت۔ شھداللہ دلمانگ بیت کہ قادوءَ براتءِ گورا مان شھرا راہ بہ دات تا اودا آ وتی وانگا سرجم بہ کنت۔ ألبت نین گرماگءِ موکل إتنت۔ قادو گون کسانترین براتا وتی پتءِ کاران آئیا دم دیگا أت۔

چہ شھرا قادوءِ کسانیءِ سنگت وتی إسکولءِ موکلانءِ وھدا پہ ترّ تابا کلـّگا آتک إتنت۔ چؤش کہ وتی بزرگان إیشان ھم شھرءِ ڈول ڈولین قصّہ آرت أنت؛ وش گپّی أت۔ قادو و آئیءِ کسانترین براتا نشت و گوش داشت۔ إیشانءِ تربیت دگہ ڈولا بیتگ أت، پمیشا شھری بچکانءِ قصّہ پہ آوان بس پوتاری إتنت۔ بلے بلوچی دودانءِ ردا مھمانانءِ دیوانا دارگا آ مجبور إتنت۔
شپءِ وھدے أت۔ قادوءِ کسانترین برات وابا گپت و پہ وپسگا شت۔ مھمانین دادو و جلالءَ جنکانءِ سرحال نون دپا کت۔
دادوءَ دیم گون جلال کت و گشت ئی "ترا ھما روچیین جنک یاد إنت؟ بسءِ تھا!"
جلال: ھما فارس؟
دادو: إنا! اُڑے ھما بلوچ کہ چادرے مان ئی پوشتگ أت؛ چیرا دامن (إسکرٹ) ئی پادا أت!
جلال: ھان! ھو۔ گندئے چونین زیبائے أت! وھدے بسءِ تھا پترت و فارس جنکانءِ ڈولا وتی چادرئی توت موت کت، بئگءِ تھا لگت دات؛ لائق چارگا أت۔
دادو: من ألـّما کہ ڈانگ ئی تو نہ شموشتگ أنت۔ فارس جنکان گوہ وارتگ۔ واللہ چشین بارگین ٹانک!
جلال: اڑے فارس چے أنت! إنگریزانءِ نیاما چوشین ڈئول ڈیل مشکلا در کپیت۔
دادو: راست گشئے، جلال۔ آئیا چم چست کت أنت وھدے منی نیمگا چار إت، گشیگا منی دلا تیرے جت ئی۔
جلال: منـّان تئی خبرا۔ آئیءِ چارگان گرکی (تفنگی) تیر گون إنت۔ مدرسہءَ بیوکین والی بالءِ لیئبءِ وھدا آئیءِ نچّگ یاد کاینت، دل چہ سینگا سٹ بندیت و آئیءِ شوھازا رھادگ إبیت۔
قادو: (پہ مسکرائی) زانان آئی چہ شمئے شھرا لڈِتگ، دگہ جاھے شتگ کہ تئی دل آئیءِ شوھازا راھی إبیت؟
جلال: نہ اڑے! آ أنگت ھمودا مئے چمانءِ کلاّ پرتر مانتر کنت۔
قادو: گڈا إنچو پَلپـَٹگءِ چے ضرورت إنت؟ وتی پتءَ راہ بہ دے، تئی سانگا جوڑینیت۔
دادو: آ گون إیشی (جلال) سانگ کنت! جلالءَ وتی لوگءِ پانک ھم نہ کنت۔
جلال: قربان پہ خدا۔ گون من آروس نہ کنت؟ آ وا منی عِشقا کنوگ إنت۔ أگر فارسے بوتین أت، جـِندئی دیری منی گورا پہ سانگ لوٹگا آتکگ أت؛ بلوچی دودان جتگ۔
دادو: إے بے پندولا بلوچی دودانءِ چے پرواہ؟
جلال: ھو!۔ تو گشت کنئے۔ بلے زانان ھمے یکـّین خبرا عیب کنت۔
قادوءَ مار إت کہ یکـّین خبر چہ حدّا گيئش چست إیر بیگا إنت۔ پہ سرحالءِ مٹـّينگا درّائینت ئی " ما گشتہ بلکین شھران مدرسہ شرتر أنت، پہ وانگا گيئشتر ھست، بلے شمئے خبر ظاھر کن أنت کہ اودا إیوکا جنکانءِ قصّہ أنت!"
دادوءَ مھرءِ سِھرا گپتگ أت، آئی خبرانءِ جُھلانکیا روگا واھوک نہ أت۔ پمیشا قادوءِ پسّوا گشت ئی "اُڑے قادو شھرانءِ شرّی ھمیش کہ اودا چم پہ چار شر رنگین جنکا کپ أنت و دو وشین تران گون آوان بیت کنت۔
جلال گشت " راست گش ئی! إے نون زندگییے کہ شما ئی کن إت۔ ھژدہ سالءِ جوانےئے تنے وھدی مھرءِ تام إت نہ چَشِتگ؟"
قادو پسّو دات "ھو کہ شما گون جنتی حوران لیئبا إت!؟"
جلال: أچہ چے۔ تئی خیالا ما مفتا إے گپان کنگائین! اودا ھر جمعہ من وتی پریءِ گورا بیتگان۔
جلالءِ إے خبرا دادو ھبکـّہ کت۔ دیم ئی گون جلال ترّینت و گشت ئی "من زانان تو پری نازءَ گشگائے۔ بلے وتی گورا ترا ھلّگ وتی جاھا آ تئی سلامان علیک نہ کنت!"
جلال پسّو دات "تو چے زان ئے بزگ؛ پیئریین جمعہءَ من ھمودا بیتگان!"
دادو گون دلجمین گالوارےءَ گشت " چوشین سیاھین دروغ۔ پری نازءَ ھفتگے بیت إنت کہ گون وتی پت و ماتا پہ ترّ تابا تھران شتگ"۔
جلالءِ دروغءِ بن وھدے ٹـُنگ بیت، گڈا دادو ئی نِھـِرّ کت۔ زھرا زھر گشت ئی "اڑے بل نہ۔ من گشان تو حالان سھیگ نہ ئے۔ وتی نیمگا، ھنچوش، حساب مہ جن"۔
قادوءَ وتی شھری مھمان وت مان وت أڑگا دیست أنت، گڈا تھا دئور ئی کت "سنگتان شما دوئین راست گش إت۔ منا شمئے خبرانءِ سرا باز شک نیست إنت، بلے یک مھربانییے منی سرا بہ کن إت؛ نین بہ وپس إت۔ صحبا ترّگا روگی إنت"۔
دوئینان یک یک نرونڈگے جت و سر إش پہ وابا دات۔
قادو وت ھم وتی نپادءِ سرا دراج کشّ إت و گون سنگتانءِ کتگین خبران سر چیئر بیت۔ دلا خیالا لگّ إت " أگر شھران بے حیائی إنچوک باز إنت، گڈا بھتر ھمش إنت کہ ما ھمدا وتی کلـّگا بے علم و زانتا پیر بہ بین و بہ مرین"۔
پدا وتی دل ئی سھڑینت " مارا گون دگران چے کار إنت۔ ھر کس وتی شلوارءِ واھند وت إنت، وتا وت بہ پھریزیت۔۔۔ من وتی پتءَ گـُشان کہ بہ رؤت ناکو شیردلءَ بہ گندیت و منی سانگا گون آئیءِ جنکا زیتا زیت بہ کنت۔ منا شات نہ بیت کہ منی دشتار شھرءِ بے حیائیانءِ توکا گيئشتر بہ مانیت۔۔۔"۔
ھمے جیڑوانءِ توکا قادو واب کپت۔ دومی روچا وتی پتءَ چارین دانک ئی گشت أنت۔ آئیءِ پت ھم ھمے خیالءِ مردمے أت۔ پمیشا قادوءِ خبر ئی منّ إت۔ روچےءَ رند دیم پہ شھرءَ رھیج گپت۔
گوات چنڈا اودا رست۔ شیردل کارا شتگ أت۔ إیوکا شیردلءِ جن گون نُنوکین چکـّا لوگا أت۔ نشارا شھداللہ سبارگ دات، وارت ئی، پدا شت مھمانجاھا آراما لگّ إت۔ بیگاھا پاد آتک، شت نشارءِ دیوان ئی داشت۔ دیر نہ گوَست کہ قادوءِ نام گپت لوگا پُترت۔ شھداللہءَ جنکءِ پوشتگین پچّان حیران کت۔ دلا گشت ئی " قادوءِ خبر راست أنت۔ شھران مردم شرّ إبیت"۔
رندترا شیردل گون کوٹ و کرواتا آتک۔ گون براتا سلام علیک بیت۔ گپ و ترانا بیگاہ إش شپ کت۔ شام ورگا رند شھداللہ و شیردل مھمانجاھا شت أنت تا وتی إھوتی گپان بہ جن أنت۔
شھداللہءَ درّائینت "شیردل من آتکگان کہ قادوءِ خبرا پہ مھرک ألـّم بہ کنان۔ قادوءِ رزا ھم ھمش إنت۔ دوئین چک ڈ َلـَگ أنت۔۔۔"
شیردل خبر پہ سرجم بیگا نہ إشت و گالا إت "شھداللہ، تو ھما کوَھنین رواج أنگت وتی چادرءِ لمبا بستگ أنت۔ نین دنیا بدلتگ۔ مردم ماہ و إستارانءِ سرا سر بیتگ أنت۔ تو ھما جاھا وتی مغز قید کتگ کہ مئے ناسرپدین پیرین بیتگ أنت۔۔۔ منی برات چمّان پچ بہ کن! کش گورا بہ چار! إے نوکین قرنے إنت"۔
شھداللہءَ إے ڈولین ڈوبارگ ساریا إشکتگ إتنت۔ نوکین گپے نہ أت۔ آئی گون سارتین گالوارےءَ وتی براتا پسّو دات " شیردل جان! ھژم مہ گر۔ پیرینانءَ ناما ھم بے تماھیا مہ گر۔ تو منا سرکچ بہ دے کہ منی گپءِ تھا کُجا چشین بدی مان إنت کہ ھنـّوگین دئورا رد لیکگ أبیت؟ زانان إے قرنا مردم سانگ نہ کن أنت؟۔۔۔ مزنین جنکـّےءَ مان إے جُلگھین شھرا بے سانگا دارگ بلوچی رواجے نہ إنت۔ مردم عیب چنت!"۔
براتءِ سارتین گالوارءِ گشتگین گپ پہ شیردل چؤ کہ کُچّلا إتنت۔ بلے أنگت وتی زھرانءِ مھارئی تنچتگ أت۔ پمیشا براتءِ گالوارءِ تام ئی نہ برت، ھما ڈولین دپتوارےءَ گشت ئی "مھرک منی چک إنت۔ و آئیءِ فکر منا شرّی سرا گوَر إنت؛ چہ تو گيئشتر۔ سانگءِ بندبست ھم چہ تئی گشگا پیسر من کتگ"۔
شھداللہ حیران بیت۔ پدا جست ئی کت " من سرکچ نہ وارت؟"
شیردلءَ پسّو دات " من پہ مھرک وتی ھم کارین سنگت داریوشءِ بچکءِ خبر منـِّتگ۔ قسمتے بیت نوکین سالءِ دومی ماھا ما چکـّان سانگ دے ئین"۔
شھداللہءَ جاور چکـّاست أنت و گون ھمیشان ھمرد وتی دلءِ مارشت ئی پہ ترکـّگا نہ إشت أنت۔ نرم نرما گشت ئی " تو ھنچوش بہ گش؛ نیک بخت۔ ضروری نہ إنت کہ ما پہ درّ دوچا بہ رسین۔ ما أبید چہ سانگبندیءِ رشتگے جوڑینگا براتین۔ تئی جنکا کہ در رستگ، شرّین گپے؛ ألـّما قادوءَ ھم وتی مٹ دستا کپیت"۔
ألبت شھداللہءَ اوپار نہ شت کمـّے بے توار بیگا رند گپ ئی گيئش کت "من فکر کتگ کہ تو ھما کوھنین قولءِ سرا اوشتاتگئے۔ نین کہ تو بجِـّتگئے، من وتی راہ دیستگ"۔
شیردلءَ زانت کہ آ میاریگ إنت۔ بلوچی دود و راھبند ئی پرؤشتگ أنت۔ بلے دودانءِ پرؤشگا آئی پہ وتی کھؤل و جنکءِ عاقبتا وشـّیانءِ روژنائین بانداتے گندگا أت۔ پمیشا دپ ئی گشیگا دوتکگ أت۔ ھچ نہ گشگا أت۔ دلا لیکگا أت کہ أگر گالے در بہ کنت، گڈا خبرءِ سرا خبرے پاد کیئت و کئے زانت کجا رئوت رسیت۔
شھداللہ گون وتی گڈی جُستا لوٹ إت کہ إے دفترا بہ پچییت۔ جست ئی کت " شرّ إنت، تو منا بہ گش ھمے داریوش چونینے إنت؟"
شیردلءِ دل نہ لوٹگا أت، بلے روچے نہ روچے شھداللہءَ سھیگ بیگی أت۔ شاید ھنـّی آئیا سھیگ کنگءِ توکا شرّییے بہ بیت۔ پمیشا سرکچ ئی دات "منی ھمکارے، إصفھانءِ مردمے إنت، بلے چہ زمانگا بلوچانءِ نیاما زند گوازینگا إنت، تو بہ گش نین نیم بلوچے ترّتگ"۔
نیم بلوچے ترّتگ! شھداللہ وتی دلا براتءِ خبر تکرار کت۔ پدا فکرا لگّ إت "منی برات واقعی مئے دئور و قرن گواز کتگ أنت۔ شرتر ھمش إنت کہ بے تواریا شپا روچ بہ کنان و صحبا وتی چادرا بہ چنڈان، پشتا مان دیان بہ روان"۔
"خدا شمارا وش نام بہ کنات" شھداللہ گشت۔ گون ھمے خبرا سانگبندیءِ قصّہ سرجم بیت۔

آنگو قادوءَ جلال و دادو وتی ھمراہ کت أنت، کئورا برزاد پہ گرانءِ بُنا شت أنت۔ پہ زیین پکنکا کـُشتگین شنکءِ رانے پشت إش گپتگ أت، گون أت إش۔ أولا چہ کئور کشءِ کلّگی مچان درمپانچ إش چت ووارت۔ پدا گرءِ بنءِ گوَرما جان شودگ إش بنا کت۔ دلا قادو گلا بال أت کہ آئیءِ پت باندا آروسءِ حالا کاریت و آئی ھمے زیتان سالونک إبیت۔ گورمءِ سارتین آپ آئیءِ دلءِ ھلاّن گيئشتر زند بکشگا أت۔ صحب سرا جلال و دادوئی حال داتگ إتنت کہ پت ئی پہ سانگبندیءِ گيشینگا شھرا شتگ۔ ھما دمانا دوئین سنگتان قادو نیمگا چارتگ أت و بچگندے جتگ أت إش۔
بران برانا آئیا دادو و جلالءِ دوشیین گپ یاد آیگا إتنت۔ إیشی سببا چہ دلا شک چست إبیت أت "چؤ مہ بیت کہ إیشانءِ جتگین گپ مھرکءِ باروا بہ بنت؟"
پدا وتی دل ئی ھکـّل کت "چؤ بیت نہ کنت۔ ناکو شیردل چشین مردے نہ إنت، وتی سرا دات، بلے بلوچی دودان نہ پرؤشیت؛ پندولءِ حقا أدا کنت"۔
دلا چؤ ھم خیال ئی آتک کہ چؤ مہ بیت ناکو شیردل دگہ زاماتے داشتگ! "نہ۔ نہ، چؤ بیت نہ کنت، أبید چہ منی پتءِ إجازتا آئی إنچوکین مزنین فیصلہ نہ کنت"۔
ھمے وڑا آ وت جنگا أت و وت مانا کنگا أت۔ سنگتان ھم دلگوش گور أت کہ قادو بران برانا دگہ دنیائے سر کشـّگا أت۔
سئین سنگت چہ آپءَ در کپت أنت۔ گورمءِ کرّا ریکانءِ سرا آسے روک إش کت و آؤرتگین گوشتا پچگا لگّ إت أنت۔ گوشت پچگا أت، آ إشکران گون جنگا إتنت۔ پچگ بیوکین گوشتءِ بو جلال و دادوءِ شـُدا گيئش کنگا أت۔ بلے قادو لاپءِ سُدّا نہ أت۔ خبر خبرءِ سرا شھرءِ قصّہ پدا چست بیت۔
جلال: شھران لھتے بلوچانءِ فارس دوستی ھمنچوک باز إنت کہ وتا بلوچ گشگ إش لج کنت۔
دادو: ھو! آ کس کہ ھمودا رستگ أنت، وا میاریگ نہ أنت، بلے لھتے کسانءِ سواس أنگت کوَھن نہ أنت کہ گون بلوچان سلام علیک إش بند کتگ و فارسانءِ کٹـّا کپتگ أنت۔
قادو: کم نسلین مردم ھر جاھا وتی پدان پیداگ کنت۔ بلوچ گش أنت کہ بے بـُندر شھرا کپیت شرّ إبیت۔
جلال: إدا زات پاتءِ خبر نہ إنت! ھنچین شر زات هست أنت کہ چہ لوڑیان پدا تر أنت۔ اُستایان سالان سال إنت کہ شھران زند گوازینگا أنت، بلے تنے وھدی وتی پندولءِ حقا أدا کنگا أنت۔ ألبت لھتے شر زاتین مردمانءِ جن و جنکانءِ جانءِ براہ پتلون، و دامن أنت۔
دادو: ھو! جلال راست گشیت۔ قادو بد مہ بر۔ تئی ناکو ھم بلوچ دودانءِ پاسداریا سُست إنت۔
ناکوءِ نام نیاما آتک؛ گندگا قادو سیاہ ترّ إت۔ روکین آسا پیلوشگا لگت، جانا چـِکـّوکین آپ ھیئد بیت أنت۔ گون دردناک و پروشتگین گالوارےءَ درّائینت ئی "دادو؛ چہ وت بہ گر پادا!"
جلال دیست۔ سنگت بن أت۔ سوچگا أت۔ درھگا أت۔ مارشتانءِ درشان کنگا گال گار إتنت۔ اُمیدانءِ ماڑی ئی ھَروجَگا أت۔ دیم تامور ترّ گا أت۔ پیشانی ئی کِرچک بیت۔ زبان خشک بیت۔ پمشا جھد ئی کت کہ آئیءِ کوپگا إیرین بارا کموک سبک بہ کنت۔ دنیاءِ ھستین جاوران آئیا سرکچ بہ دات۔ وتی ھَوبتا آئی گون شیواری گالائت "إے دگہ دئورے۔ نوکین دئورے۔ زمانگا گون ھؤر مردم بدل بیتگ أنت۔ ضرورت باز بیتگ أنت۔ مردم چہ دود و راھبندانءِ بندان آزات أنت۔ یاگی أنت۔ مال و زرّا وتیگی کتگ أنت۔ چُشین حالتا تئی ناکوا میاریگ کنگ ناروائییے۔
گپا فایدہ نیست إنت۔ تئی پت ودی إنت۔ باندا حالان کاریت"۔
قادو أنگت غمیگ أت۔ دل ئی دیت کنگا أت۔ إے خیال ھم آیگا أت کہ پت ئی باندا حالان کاریت۔ گشت ئی "منی پتءِ إے أولی رند نہ إنت۔ چدا پیئسر باز بران شتگ۔ أگر خبرے بیتین أت، ألـّما منا گشتگ أت ئی"۔
جلال گشت "شاید سرپد بیتگ، بلے ترا گشگ ئی ضروری نہ زانتگ۔ ھر پیم إنت، باندا تو سھیگ بئے۔ دلا باز مہ ور"۔
جلالءَ قادو وتی منـّا سھڑینت۔ ألبت قادو وتی دلا چونڈگا أت " خدا وت چؤ مہ کنت۔ منی پھکین اُمید خاکان ھؤر إبنت۔ منی جتگین بٹاک شگان جؤڑ إبنت۔ أگر بچکانءِ خبر راست بہ بنت، سانگبندی وتی جاھا، من گون شیردل و آئیءِ چکـّان سلام علیک ھم نہ کنان"۔
رانی گوشت کباب بیتگ أت۔ سئین سنگتان ورگ بنا کت، بلے قادو گشیگا ریک پنچ جنگا أت و ورگا أت۔ ھر دپار آئیءِ گـُرّا دِرّان أت و روان أت۔
وھد نہ اوشتات۔ بیگاھا دیم پہ لوگا شت أنت۔ قادو أنگت دلا بے سکامات أت۔ شام ورگی نہ أت، بلے دپارے پہ مھمانانیگی وارت ئی۔ پدا ماھلـّہ پہ إستارانءِ حساب کنگا وتی نپادءِ سرا تچک بیت۔ شپ ئی بے وابیا گوازینت۔ صحبا چم ئی سھر ترّتگ إتنت۔ گشیگا پُر دردین دلءِ خون چمّا آتکگ إتنت۔ پہ پتءِ آیگا تکاسر إت۔ نے بانءِ تھا آرام ئی آتک، نے کہ کاپرءِ چيرا۔ کسانترین براتءِ مسکرائی پہ آئی ٹؤک إتنت۔ ماتءِ تسلا تیزاب۔
بیگاہءِ کلاک دوءَ شھداللہ رست۔ قادوءِ بے موھیا پت پہ حالانءِ دیگا مجبور کت۔ خبرانءِ إشکنگا قادو دلپروشتر بیت۔ درّائینگا لگت "منی تپ! تئی برات سکـّین بے پکارتے ثابت بوت۔ نہ إیوکا وت ئی سبک کت، مارا ھم گون وت مین ئی کت"۔
شھداللہ گشت "منی چک! أگر آئیا بے حیائیءِ جوّا دئور کتگ، پہ إیشی مارا چے؟ ترا من باندا دگہ جاھے زامات کنان۔ چہ مھرک شر رنگتر و وانندہ ترین جنکے پہ تو در گیجان۔ ھنچوش نہ إنت قادوءِ مات!؟"
قادوءِ مات کشا نشتگ أت۔ دلا باز هست أت، بلے مردینی سرحالے أت۔ وتی مان وتی گپے أت۔ آئی نہ لوٹ إت کہ براتانءِ جیڑوا وتی ناما ھؤر بہ کنت۔ دلا خیال ئی کت " جونائیا نشارانءِ نام سبک إنت۔ مفتا پرچا وتی ناما ھؤر بہ کنان!"
ألبت قادو وا آئی چکّ أت۔ چک دل أڈی دیگی أت۔ تامورین دل ئی بؤد آرگی أت۔ آئی شھداللہءِ جستءِ پسّوا درائینت "تئی پت راست گشیت۔ ألـّما شیردلءَ شر نہ کتگ۔ ألبت مردمانءِ کندگانءِ ذموار آ وت أنت۔ ما پہ کیئگی!۔ ما نہ گشتگ کہ گون گجران سانگبندی بہ کنت و وتا کلاگی۔ نے ما آئیءِ جنک ناز کتگ۔ تا زی ما پہ سانگبندیا ھدوناک بیتگین"۔
قادوءِ دلءِ سھڑگءِ برانز ودی بیت أنت " ھنچوش إنت ماتی، تو شر گشئے۔ ما پرچا پہ دگران وتی خونان بہ ورین۔ ھر کس وتی نیک بدءِ واھند وت إنت"۔

دو ماہ پرگوست۔ چہ شھداللہءِ نیمگا دعوت شیردلءِ لوگا ھم سر بیت۔ ھما شھرا کہ شیردل جاہ منند أت کلـّگءِ کھدا ھم نِندوک أت۔ آئیءِ جنک دَھمی کلاسا دربرگا أت۔ أنگت پندولءِ حقا أدا کنگا أت۔ گون ھمے جنکا قادوءِ سانگبندیءِ دعوت أت کہ شیردلءِ لوگا رست۔
ھینّاءِ شپ آتک۔ قادوءِ دپ پر کندگ أت۔ وتی دوست و مھمانان وش آتک کنگا أت۔ آوانءِ مبارکیان زیرگا أت، مبارکبادی دیوکانءِ منـّتان گرگا أت۔ قادوءِ کسانترین برات و سنگت دادو، و جلال مھمانان چاہ چلیم کنگا إتنت۔ شھداللہ گون وتی ھم عمرین کماشان کنڈےءَ نشتگ و ٹاک ٹاک کندگا أت۔ ھمے درگتا شیردل گون وتی سنگت داریوش آتک أنت۔ قادو گون پُرمِھرین روےءَ آ وش آتک کت أنت۔ وتی جند ئی آوانءِ ھمراہ بیت۔ پہ عزت دیوانءِ تھا نندارینت أنت۔
داریوشءَ قادو إخلاق، قد بالاد و ڈول ڈیل دوست بوت۔ گجری راھبندانءِ ردا أبید چہ ستا دیگا وتا داشت ئی نہ کت۔ دیم ئی گون شیردل کت و گشت ئی " بَہ بَہ! من ندوستہ أم کہ برادرزادہ إی بہ أین خو تیپی و زرنگی داشتید (من نہ زانتگ کہ چشین زرنگ و وش بالادین برات زھگے ترا ھست)۔
شیردلءَ دلا گشت کہ من إیشی وتی ھمراہ کتگ کہ شھداللہءَ وتی مزنین شان و حیثیتا پیئش بہ داران۔ بد بخت أنگت چہ ھماوان أثرمند بیت۔ دیم ئی گون سنگتا کت و گشت ئی "ھو! منی براتا لوٹتگ أت کہ گون منی جنکا إیشیءِ سانگا بہ ٹھینیت، بلے من نہ منّ إت"۔
داریوش کہ ظاھرا چہ وتی خبران شموشکار أت، گالا إت " چے سببا تو إیشی نہ زرتگ؟"
شیردل گشت " أولی سبب إیش إنت کہ مزنین وانندوے نہ إنت، بس ھشت کلاس ئی در برتگ، پدا تو وا زانئے من پیسرا تئی بچک زرتگ"۔
داریوش گون پشومانی گشت "خیر تو وا وتی کماش وتئے۔ ألبت وتی مردمان کس پہ کم وانندوی ناز نہ کنت۔ إے دنیاءَ ھزاران ھنچین مردم ھست أنت کہ ھام أنت، بلے ھزار وانندہءِ زورا جن أنت و باز شادھترین زندے گوازینگا أنت"۔
کمّے بیتواریا پد داریوش پدا خبر دپا کت "راستے ترا سھیگ بہ کنان کہ منی بچ چہ سانگبندیا بجّتگ۔ من باز پہ دردان۔ آ گون بلوچےءَ سانگ کنگا واھوک نہ إنت۔ پہ وت ھمانگری؛ إصفھانی جنکے درئی گپتگ۔
جنک آئیءِ ماتا ھم سک دوست إبیت و ھدوناک إنت کہ گون ھمائی چکـّا سیر بہ دات۔ منا باز پھل بہ کن۔ چکـّانءِ دیما برے برے مات و پت بے وس إبنت۔
دوستی وتی جاھا، بلے پہ دوستیا چکـّانءِ واھگان ندر کنگ عاقلانءِ کار نہ إنت"۔
داریوشءِ گپ کنگءِ درگتا شیردل إیرمِران أت۔ چؤکہ روچءِ سرا سستگ و إیر کتگین نازرکین پلّےءَ دیم ئی گیمرإت۔ گندگا آپءِ تھا کپتگین پوڑے أت۔ دلا آھے کشّ إت ئی و گون وت گشگا لگت "شیردل ترا پندولءِ حقان گپت"۔

http://www.balochinews.com/2009/01/blog-post_3706.html
Hoo Pada Hore Gowreth Mah Wathi Zamenan Keshen MAsh O Parmash Beth Dunya o Jehan e Murrg Kayanth Ksse Balle Nadanth Kase Hech Hum Nagosheth Par Cha K Ae MAni Zamen Anth Aeshe MAlik Man wathan........................................

Offline Noora baloch

  • Content Contributor
  • ****
  • Posts: 106
  • Karma: 6
  • MahRang E Mahen Darweer Beya Katrahe Dil a Dae....
بــــــــرق۔ آزمانک: ولیـد گـربنی
« Reply #1 on: January 03, 2009, 03:55:19 PM »

بــــــــرق۔ آزمانک: ولیـد گـربنی


إے آزمانگ مئی 2003ءَ ماهتاک بلوچی لبزانکءَ شنگ بیتگ۔ نین من إیشیءِ نبشتہ کنگءِ راھبندا گون ھور لھتے گال و گالبند مٹینتگ أنت۔ إیشیا من ھردسالین مھرنھادءِ ناما ندر کنان.

دو یا سئے سالءِ مدت کہ گوزیت، گڈا ملک و دیارءِ یاد منی ڈولیں درانڈیھیں مردماں گیڑ کن أنت۔ کش گوَر‏ءِ ھر چیز گندگا پہ ورگا کیئت، واب کم ترّیت و سرچکرّگا لگیت۔ پمیشا هنچوش که منا موہ دستا کپتگ أت، پہ گلزمینءِ دیدار و وارسانءِ گدارا وتا سرکتگ أت۔ ملکا منا ھفتگے پر گوَستگ أت، بلے أنگت باز گندگی أت و باز جاھاں روگی أت۔ بازین سیاد أنگت گندُک نہ کتگ إتنت۔ سنگتانءِ رو آ هم تنے وھدی نه کٹتگ إتنت۔ إنشپی منی مهماندارانءِ مھمانجاها گون من ھور مھیمءَ ھم داشتگ أت۔

وھدے مئے مھماندار پہ وپسگا شت أنت، گڈا ما دوئیناں وتی سازمانی کار گیشینت أنت ۔ رندترا مھیمءَ وتی مارشتانءِ بیان کنگ بُندات کت۔ من آئیءِ گپ کہ منی خیالا بازیں نوجوانانءِ دلانءِ پاھار إتنت؛ شرّی سرا گوشداشت أنت۔ پہ جوابا وتی لیکہ ھم درشاں کت أنت۔ گڈسرا پہ آئیءِ دل أڈیا من گیئش کت؛ "من عشقءِ نام باز إشکتگ و وطنءِ عاشق ھم باز دیستگ۔ تئی مھرا ھم وتی جاہ و مقامے هست إنت۔ أگر ستک دل بچارے، إے ھدوکی تئی مقاما چہ بازیناں برزتر بارت۔ من نه لوٹان ترا دلپروش کنان۔ گون هما گپان که من کت أنت، منی واهگ أت که چه إے راہءِ گرگٹاں ترا ڈاہ دیان، بس همے منی دلی لوٹ أت۔ پچیکہ مئے چاگردا مان إے پڑا چہ سوبینیا سرانءِ روگءِ خطرگیئشتر إنت"۔
پدا په دلجمی دیگا گالائتان "من چہ ترسوکیں کماشاں نیان۔ منی دستا أگربه بوتین أت من وت ترا کوپگاں چست کتگ أت و مان وطن دوستانءِ أنگریں پڑا إیر داتگ أت۔۔۔"
مھیم منی گپ گڈ ّ إت و گشتی " واجہ سید ظھور شاہءِ سوج په ما کلاّن نقش أنت کہ گشیت '
أنگّریں واھگءِ سوگات أنگـر
دل أگر أنگر إنت، أنگار نه بیت'
ما گون مشکلان‏ءِ گندگا و ظالمانءِ واکداری و زورءِ مارگا چه وتی حقان دستبردار بیت نه کنین۔۔۔"۔

ھمے ڈولا منی و مھیمءِ گپ کٹّ إت أنت ۔ وھدے میتگ پھکا بے ترک توار بیت گڈا مھیم وتی واھگانءِ منزلءِ نیمگا گامگیج بیت۔ ألبت ناکو دوستلءِ وتگـُش که آئی سرا کمال خان شعرے ألھان کنگا أت أنگت ڈاہ أت۔ مردمانءِ گشگ أت کہ دنیاء وپت، بلے ناکو دوستلءِ وتگوش ھیچبر واب نہ کپت۔
مھیمءِ روگا دیئر نہ گوَستگ أت کہ یک أناگاہ برق مرت أنت. ھر نیمگا تھاریا مان شانت۔ ناکو دوستل ٹیپ ھم بند بیت و گشیگا کمال خان کسےءَ ناگٹ کت۔
مردم گرمیءِ سببا نرم نرما چہ وابا پچدرھت أنت۔ ھر یکے وتی ھیداں پھک کنان و چمان لتاراں چہ نپاد، بؤپ و بالشتانءِ سرا چست بیاں بیت۔ کورو پـَچورو کنان و گون یکادگرا ڈیک وران چہ کوٹی و بانان درا روان بیت أنت۔
باچکـُلو من مھمانے ھساب إتان، بلے وتی براتءِ لوگ أت۔ پمیشا من دل تنا وھدا داشت نہ کت که کسے به یئت و منا راھشونی به کنت کہ چے به کناں۔ هنچونائیا چُک چوریانءِ صلوات سیڑوا کس زانت نه کنگا أت که کئے پہ کجا و کئے پیسر یا کئے رندا أت ۔ درا ھم تھار ماھیا مانپوشتگ أت، بلے إدا کـَد ھیدانءِ ھوشینگا ھوا خنک أت ۔ درا مردم یکا دگرا گالوارانءِ سرا جاہ آرگا إتنت ۔ گوں ھمے گالواران مات وتی چکـّا، چک وتی پتا و مرد وتی جنا شوھازگا إتنت ۔

باز وھد پرنه گوستگ أت کہ ماں شیواراں سرکارا برق رسینتگ أت، بلے ھمے گونڈیں وھدا مخلوقا هنچوش ھیئل کتگ أت کہ پہ بازیناں برقءِ روگ بزاں نفسءِ سِدَگ أت۔ من وھدے بے برقیا مخلوقءِ تلوسگ دیست، منا گیڑ آتک أنت گوستگیں دور۔ ھما دور کہ ما چہ وتی هندان رھیج گپت إنت و ھشت تا دہ تھاریں شپانی سفرا رند ماں گوادر سر إبیت إنت۔ مارا و مئے اولاکاں تھارماھیءِ ھیچ گرز نہ أت ۔ ألبت ما مجبور إتین کہ تھاروکیا سفر به کنین پچیکہ گوں دولتیاں ڈیک ورگءِ ترس کمتر أت۔
مروچاں! گوادر و شیوارانءِ ھمے سفر کلاکانءِ توکا گوزیت۔ بازیں کس وتی مودانءِ چنائینگا صحبا رو أنت و بیگاها پدا وتی لوگا أنت۔ إے بے نپسانءِ برکت إنت۔ قدرت إنگریزاں خیر به دنت کہ ھمیش إش أڈ کت أنت۔ مئے ملک وا تنے وھدی پہ وت جُتکے ألکاپیں کؤش ھم أڈ کنگءِ لایق نہ أنت-

بل إیشیا و بگریں وتی بنگپا۔ گپ بیگا أت برقءِ مرگ و چہ کوٹیان در رچگئے۔ وھدے من دیست که منا مهمانداری کنوکین منی برات گوں وتی چوریاں گسی إنت گڈا من نرم نرما دیم پہ کئورا رھیج گپتان۔ تھاری وا ھست أت، بلے من ھمے میتگءِ چکے إتاں۔ أنگت چہ إیرکپءِ جُگرءَ ھم شموشکار نہ إتاں
ھرڈول! من وتا شیپ دپءِ گوَرما رسینت۔ پہ جانءِ شودگا من آپءِ توکا دئور کت۔ آپءِ خنکیا چہ گرما منجتگیں منی ساہ پدا آرت۔ من یک زنڈیں کلاکے ھمے گورمءِ تھا برے سربر آپءَ، برے چیر آپءَ، برے تلگیا و برے جھلانکیا گوازینت۔
نوں بام دیگا أت۔ من وتی پُچ پر کت أنت و دیم پہ میتگءِ مسیتا چھر کتان۔ نماز إمامءِ پشتا وانت، پدا پہ بیانءِ گوشدارگا کنڈےءَ نشتاں۔ دیر نہ گوست کہ إمام بیانا لگ إت۔
وھدے ملاءِ بیان سرجم بیت، گڈا رئیس شوری ‌علیرضـا چست بیت، کاگدے چہ جیبا کشّ إت ئی و پدا درائینت ئی " إے أولی رند نہ إنت واجھاں! گمشاد گوَستگیں رندا کہ آتکگ أت، مئے سرا ھنچیں جیڑوے دئور ئی داتگ أت۔ إے رندی پدا واجہءِ (پہ طنز) برکتا مئے ورنا سرکاری واکانءِ زاہ و لٹـّاں به ور أنت۔۔۔"

منی برات ھم نشتگ أت چؤش منا آئیءِ دل ھم پاھار آرگا أت۔ منی درد درانڈیھی و براتئے سرکارءِ ظلم و زوراکی إتنت۔ إے نگیگیانءِ آماچ سرجمیں چاگرد أت، بلے مھلوک بیوس إتنت۔ زوراکیاں مردمانءِ چم کؤر و زبان لِل کتگ إتنت۔ کسءِ توکا حقیں دانکے چہ دپا در کنگءِ ھمّت پشت نہ کپتگ أت۔
من شرّی سرا سرکچ وارت کہ ھرکس إداں جاورانءِ آماچ أت- پھکانءِ دل چہ محرومیاں ریئش إتنت، بلے بے واک إتنت۔ من إیوکیں کس إتان کہ چم پچ إتنت و زبان آزات أت۔
مارگا إتاں کہ منی براتا منا مھمانداری کنگءِ رو گرگا إنت۔ دلا خیال آتک کہ أگر آ گپ به کنت، گڈا وتا دلسیاہ کنت۔ أنگت جاور آ ڈولا سازگار نہ إتنت کہ چہ استمانءِ توکا پہ حقان توارے چست به بیت۔ إے منی روک کتگین رژنءِ برانز إتنت که ژیمب و تھارماھیا پادتراپ دیگا إتنت و تهاری په وتی رکـّینگا زرانک سُرینگا أت۔
من وا مھمانے إتاں، چہ ھر ڈولیں؛ سرکاری یا مردمی reaction ءَ وتا رکـّینگءِ سرجمیں راہ دستا إتنت۔ پمشا منا هچ پیمین بیم مان دلا نیست أت. چست بیت و گشتان " واجہ علیرضا! یک نوجوانے عقل هوشا رسیت، گڈا ترّتاب کنت، حال و خبر إشکـُنیت، گوں وتی چمّان گندیت کہ آ دگہ راجانءِ ورنا چہ دگنیا ھر ڈولیں نعمتا بھرمند أنت۔ آوان مروچیءِ فکر نیست و پہ بانداتا غمی نہ أنت. لئیب إنت، ڈوھل سرنا، چنگ سرود و سهبت إنت۔ عیش و نوش إنت۔ آوانءِ فکرانءِ ردوما غم و أندوہ چؤش کہ وروکا ورگا نہ أنت۔ پدا وتی سرا چمّاں شانک دے أنت، گڈا أبید چہ نیزگاری، نااُمیدی، زبھری، غم، نادراھی و پریشانیا دگہ ھیچ نہ گند أنت۔ إیشانءِ چکـّا وتی مات و پتءِ بے وسیان گند أنت! باور کن واجھ؛ إے ڈولیں نوجوانانءِ ترسینگا واجہ خداءَ وت چہ آسمانءَ إیر کپگ لوٹیت۔ منی و تئی گـُرّ نِھـِرّ إیشانءِ إرادوان مٹـّینت نہ کن أنت۔ نے کہ سرکارءِ گربند و لٹ کٹ إیشانءِ دلانءِ پاھاراں إیر آرت کن أنت۔ إے ورنا پہ وتی حقان پاھوا ھم چک أنت و وتی گٹـّا لوپ کن أنت".
من گینے ساه پر کت و وتی خبر دیمترا برت "إے چاریں دانک کہ إے ورنایان مان تاکدیمےءَ نبشتگ أنت و پہ منی و تئی دلگوشا ماں شپءِ تھاریا دروازگانءِ دپا دور داتگ أنت؛ پرے خبرا آ لائق ستا و شاباشی أنت۔ منا و ترا پــِر نہ جنت کہ آوانءِ خلافا وتا چہ زھرا نـُک نادوک به کنیں".
چدا پد من دیم گون مردمان کـُت و گشتان "منی واجھاں! تا کدیں ما چمّان بندیں، گوشاں کرّ کنیں، وتی دلاں پہ زور سھڑینیں و ھنچوش شون دیگءِ کوشستا کنین کہ گشیگا ھچ نہ بیتگ و نیکہ چیزے بیگا إنت۔ نون وھد آتکگ کہ ما کماشی و مستریءِ ناما اُستمانءِ حقان مه جنین۔ ضرورت إیش إنت کہ وتی استمانءِ حقانءِ پچگرگا چه ورنایان پیسر به بئیں، أگر پہ کار بیت وتی جانانءِ ندر کنگا ھم پیش به کپیں...!"

أنگت منی گپ نہ کٹـّتگ أت که منی براتا دیم گوں من کت و گشت ئی "گمشاد! من ألّماں إدا نشتگیں مردمان شمئے کلہ رست۔ شرتر ھمیش إنت گوں گیشتریں گپّاں وتا سر درد مدئے۔ ترا سفرے دیما إنت۔"

Hoo Pada Hore Gowreth Mah Wathi Zamenan Keshen MAsh O Parmash Beth Dunya o Jehan e Murrg Kayanth Ksse Balle Nadanth Kase Hech Hum Nagosheth Par Cha K Ae MAni Zamen Anth Aeshe MAlik Man wathan........................................

Offline Noora baloch

  • Content Contributor
  • ****
  • Posts: 106
  • Karma: 6
  • MahRang E Mahen Darweer Beya Katrahe Dil a Dae....
آزمانک: ولیـد گـربنی
« Reply #2 on: February 09, 2009, 05:48:44 PM »
إے آزمانک سائنسی یے إنت که ستمبر 2000ءَ ماھتاک بلوچی لبزانکءَ شنگ بیتگ۔ إدا إیشیءِ نبشتہ کنگءِ راھبند و لھتے گالبند مٹـّينگ بوتگ أنت۔
آ وھدی کہ من إے آزمانک نبشتہ کتگ أت، بازین ھنچنائین مردمان Gene و DNA ٹسٹانءِ باروا ھچ سرپدی نہ بیتگ۔ ألبت مروچی ھر کس سرپد إنت و باز جاگھان عملا ً رندگری إبنت۔ ولید

جگدانءِ کسانین میتگا مرواردءِ موتکانءِ توار پدا رُست أنت۔ یک برے پدا وتی گـُشان ئی درت و مودان روسینگا لگت إت۔
آئیءِ دوئین بچ کہ پنچ روچ ساریا گار بیتگ إتنت، میتگءِ مردمان بازین شوھازا رند إنشپی آوانءِ جسد آرتگ إتنت۔ یک ماھے ساریا آئیءِ لوگواجہ سیاھیان اُشترءِ سرا شپوکیءِ ڈوبها تیر کتگ و کشتگ أت۔ نین بچانءِ مرک! آئیءِ سر پــِر کنگا نہ أت۔ مخلوق ھم حیران إتنت۔ پرچا کہ نوک جنوزامین مرواردءِ دوئین بچانءِ جسد مردمان چہ یکـّین جاگها درگپتگ إتنت، هچ ظاھری ٹپّ إش پــِر نیست أت۔
چہ پرسءِ پتـّرا پیچگا پیسر میرخان چہ مردمان دستبندی کت کہ پہ گھارزھگانءِ مرکءِ سببءِ درگبجگا آئیا کمک بہ کن أنت۔ آئی دست بست و گشت "واجھان منا شک إنت کہ جگدانءِ کوھان إلـّتے ھست إنت و پہ ما میتگءِ مردمان ھژدری إنت کہ إیشیا در بہ گيجین۔ أگر در نہ گِپین، باندا روچ ما و شما پشت کپتگین ھمے وَیلءِ آماچ بیت کنین"۔

چہ إے مردمانءِ مَرکا و میرخانءِ شئور بندیا تحصیلدار ھم سھیگ بیت و صحبا ماھلـّہ کہ أنگت بازین مردمان وتی چمانءِ پچ نہ ششتگ إتنت، و نمازیان نوکی چہ نمازا چھر کتگ أت؛ دو سپاھی میرخانءِ گوَرا آتک أنت۔ سپاھیان گشت "واجہ میر خان ترا تحصیلدارا لوٹِتگ و تئے گھارزھگانءِ بیرانیءِ باروا گون تو گپ کنگ لوٹیت"۔
میر خان پولیس إسٹئشنا شـُت و تحصیلدارءِ لؤٹءِ پدا وتی أندوہ ئی بیان کـُت۔ تحصیلدارا ملاوانءِ ڈولا درائینت " میرخان! تو بہ زان کہ مرگ و زند خداءِ دستا أنت۔ آ بہ لوٹیت بارت و بہ لوٹیت ودی کنت۔ خدائی کارانءِ سببان زانگ ضروری نہ إنت"۔
میرخان گشت " سر و جان ندر إنت پہ آ برزینءِ شانا۔ ألبت آئیا وتی بندوان ھوش داتگ تا چیزان سرکچ بہ وَر أنت، یا کمّا چہ کمتر زانگءِ جھدا بہ کن أنت۔ من إیشیا وتی ذمواری لیکان کہ وتی دوزواھانءِ أناگتین مرکءِ سببا در بہ گیجان"۔
چہ میرخانءِ گپا گوشدارگا رند تحصلیدار نِگوَم بیت۔ تـُشے اومان کنگا رند وتی واکا پیئش دارگ ئی بنا کت و زهرا زهر گشت ئی "میر خان! من ترا سرکچ دیگءِ جھدایان کہ إے ڈولین کـَپتانءِ سببان سرکار هم زانگ لوٹیت۔ سرکار ھم وتی شھروندانءِ مرگا پہ درد إنت۔ ألبت ھر کارا یک راھبندے ھست۔ أگر ھر کس وتسرا واکداریا به زیریت، گڈا کس پہ کسی ئی نہ بیت"۔
"راست گشئے! شرّین سرکار وتی استمانءَ زوالیا پہ درد إبنت۔ تو ألـّما زانئے، مارا چہ إے ملکا ھچبر کمکے نہ رستگ، ھنـّی ھم اُمیدوار نہ ئین"۔ میرخان گون نااُمیدی گشت۔
تحصیلدارا دپ پُر کت کہ وتی واکداریا گيئشتر پیئش بہ داریت، ھمے درگتا کسےءَ دروازگ ٹـکّ إت۔
اوشتاتگین سپاھیا دروازگ پچ کت، تحصیلدار دیم پہ دیما نشتگ أت۔ درا اوشتاگین مھمانءِ سرا چم ئی گپت أنت۔ جاہ سِرّ إت۔ "میجر صاحب! شما إت! بیا، بیا واجه بیا۔ إیش إنت میرخان۔ ما گپتگ و آرتگ"۔ ھمے خبران کنان، تحصیلدارا وتی کرسی یله دات، میجر تھا پُترت و خالی کتگین کرسی ئی دست گِپت۔
میرخان تھتالےءَ کپت۔ دلا جست ئی کـُت " إے چے جاورے؟ أولا سپاھی، پدا تحصیلدار و نین میجر! بارین دیمترا کئے کیئت؟"
میجرا دیم گون میرخان کت و گشت ئی "ما تئی دوستواھانءِ بیرانیا سک پہ دردین؛ مارا وتی غمان شریک بہ لیک"۔
وتی دل پدردیان پیئشدارگا رند میجرا گشت "مارا بنجاھی سرکارا حکم داتگ کہ ما گيئشتر پٹاسکاری بہ کنین و ھفتگےءِ تھا آوان وتی پٹاسکاریءِ سرجمین حالا راہ بہ دہ ئین۔ ھمے ردا ما باندا صحبا لھتے أفسر جَگدانءِ کوھان راھی کنین"۔
میرخان فکرا لگّ إت کہ جیڑوے کہ میتگءِ مردمان سرکچ دیگ ئی آسودگین کارے نہ أت، نین چہ سپاھیان بہ گر تا بنجاھی سرکار ئی بہ داریت؛ پھک پٹاسکاریا واھوک أنت؛ ألـّما إدا یک زنڈین دستے ھؤر إنت۔ وتی دیم ئی گون میجرا کت و گشت ئی "مجیر صاحب! باور کن پہ شمئے منتـّانءِ گرگا منی زانتءِ گال ناسرجم أنت۔ شمئے إے جھدءِ منتـّا منی اوبادگ تا ھفت پشتا گِر أنت"۔
"تو برو و إیمن بہ بی۔ ما چہ مروچیا وتی دفتری کاران بنگیج کنین" میجرا دلجمی دات۔
میرخان چه إدا رخصت بیت۔ پدا میجر گون تحصیلدارا گپا لگّ إت۔

میرخان چہ اودا وا رھیج گپت، بلے راھا گون وت جیڑگ ئی بنا کت کہ آئیءِ گھار زھگانءِ مَرکا سرجمین سرکار جنبتگ! ھچ شک نیست إنت کہ إدا زنڈین دستے ھؤر إنت۔
دلا خیال ئی کت "منی خیالا جکانءِ بنءِ کانیگا زھر إش مان کتگ! إے أولی رند نہ بیت، چدا پیسر ھم یاگیانءِ خلافا جنگءِ درگتا فوجا باز رندا گانیگ و تالابان زھر مانرتکگ أت۔ ألبت آ دئورا دلوَت باز بیتگ، آ چہ مردمان پیئش کپتگ أنت و آپ إش وارتگ۔ وھدے چہ آپءِ ورگا رند دلوَت مُرتگ أنت، گڈا مردم ڈاہ بیتگ أنت، آپ إش دپ نہ جتگ أنت"۔
"ألمـّا ھنچین گپے بیت، أگر چؤش مہ بیتین أت، گڈا جسدان ٹپـّے ضرور پـِر بیتگ أت"۔ میرخان ھمے ڈولا جَوَڑ إت۔ ألبت رندا ترانگ کپت کہ گھارزھگانءِ شوھازءِ درگتا آئی ھم جکانءِ بنءِ کانیگا آپ وارتگ أت۔ أگر آپ سراماد بہ بیتین أت، آئیا ھم چیزے بیتگ أت۔
"نہ! منی خیال گشیت إدا خبر چہ کانیگےءَ زھر مان کنگا دیما تر إنت۔ پرچا کہ بنجاھی سرکار ھم وتی دستان ھؤر کنگا إنت"۔ پدا وتی خیالءِ مَھریا تاچینگا لگت، إلبت سرجمین پهناتان چارگا رند هم ھچ جاہ سر نہ بیت۔
نین دلا شئور ئی بست " من وت کارے کنان، نہ ھلاّن کہ سرکار وتی وتگڑین حالے شنگ بہ کنت و منی گھارزھگانءِ خون بے پَد بہ بیت"۔

دومی بامگاھا إھوتا وتی کتارئی بَست، تفنگ ئی زرت و دیم پہ جگدانءِ کوھان برزاد بیت۔ اودا جکانءِ پشتگورا تلارانءِ پشتا وت ئی أندیم کت و نشت۔ ھمے اُمید ئی کت کہ سرکاری واک ألـّما جکانءِ کش گورا کا أنت۔ ھرچے کن أنت آ چہ پشتگورا گندیت إش و ھمے ڈولا رازان سھیگ إبیت۔
نیمروچءِ درگتا ھلی کاپٹری توارےءَ آئی ڈاہ کـُت۔ دیست ئی کہ ھلی کاپٹر آتک چه جکان ھمادست ڈنپادءِ سرا نشت۔ چارکس گون یک یک دستی کالایے درگپت أنت و إے دیم آدیم شوھازإش بنا کت۔ دیر نہ گوَست کہ چہ ھمشان یکـّےءَ آدگر وتی نیمگا توار کت أنت۔ میرخان خیالءِ سرا سر کشّ إت، بلے کس ظاهر نه أت۔ بس پادانءِ برمش إتنت کہ دِرک إش کـُت۔
نین ھلی کاپٹرءِ نندگا کلاکے پرگوستگ أت۔ میرخان پدا ھلی کاپٹرءِ چالو بیگءِ توار إشکت۔ سَرُک ئی کت۔ دیست ئی کہ مردم چہ شیرّا سرکپگا أنت و شت ھلی کاپٹرءِ تھا نشت أنت۔ دیر نہ گوَست کہ ھلی کاپٹر گون مردمان چست بیت و پدا شت۔
میرخانءَ درک کت دیم پہ ڈنپادءِ ھما شیرّا کہ مردم سرکپگا إتنت۔ شیرّ جاگہ جاگہ نرم أت۔ أگر ألکاپیا إنـّا، بلے أندازہ جنگا مردمانءِ پادانءِ پَد درگیجگ إبیت أنت۔ ھمیش آئی چاران کت أنت۔ دیمترا چم ئی ما یک درّےءَ گپت أنت۔ حیران منت؛ أبکـّہ منت۔ دلا گشتی "إے چییے؟ مان إے ترندین شیرّا چشین بلاھین درّ؟ نہ چاتے! بلے إدا کئے چات جنت؟ چاتے نہ إنت، منی خیالا بیرے گپتگ۔ بہ دار چاران!"
ھمے ڈولا گون وتی خیالان سر چیر أت کہ نزیکترا رَسِت۔ توکا سَرُک ئی کت۔ پدا دلا گشت ئی کہ أگر إدا بیرے کپتگ، گڈا بزان کہ بیرے بیت۔ ھنچنائین بیر إے شیرّا چؤش بُرّ إت نہ کنت۔ ھمے درگتا تھا گِندیت کہ بلاھین آسنے کپتگ۔ "یا پروردگار! إے چے بلاھے؟ إدا کئے آسن دئور داتگ؟ آخر چے جاورے۔۔۔؟"
أنگت دلءِ جَوَڑگ نہ کـُٹـّـِتگ إتنت کہ پدا ھلی کاپٹرءِ توار رُست۔
دِرک ئی کت۔ دیم پہ وتی سنگرا شت۔ ھمنچو سنگرا نزیکتر بیان أت، ھلی پاپٹر توار ھم نزیکتر بیت۔ پشتا چک جنان أت۔ ألبت أنگت ھلی کاپٹر ظاھر نہ أت۔ ھیسک ھمپان وتی سنگرا سر بیت۔ ھلی کاپٹر أنگت درا نہ أت۔
کمّوکےءَ رند دو چتری ھلی کاپٹرےءَ سر کشّ إت۔ پیسری یک چترییے أت۔ إیشی ڈنپادا نہ نِشت، دیم پہ دِرّا شت۔ درّءِ سربُری نیمگا مردمے سادءِ سرا إیرگیجگا لگت۔ مردم أندیم بیت، ساد برزاد کشـّگ بیت۔ نین زمزیلے لونج کنگ بیت۔ زمزیل سک زنڈ أت۔ مردمانءِ دستا إیشیا سُرینگ ممکن نہ أت۔ إیوکا بے نفسانءِ کار أت۔
باز دیر نہ گوَست کہ ساد لونج بیت، مردم سادا برز کشّ إت۔ مرد کہ ھلی پاپٹرءِ تھا شـُت۔ زمزیلءِ تـَنچگ بنا بیت۔ ھلی کاپٹر أنگت آسمانءِ دیما أت۔ گندگ بیگا أت کہ باز زؤر جنگا أت، گون توارءِ ترندتر بیگا مردم سرپد إبیت أت کہ هلی کاپٹر گيئشتر زؤر جنگا أت۔
درّا کپتگین لوٹین آسن چست بیان بیت۔ چہ شیرّا سربرا آتک۔ لوٹے أت۔ چہ پیسری ھلی کاپٹرءِ جونا کسانتر نہ أت۔ ألبت لـُپتگ أت۔ جاہ آتگ کہ پروشت پروش أت۔ "ھو! ھمیشی درّا کپتگ أت"۔ میرخانءَ وتا دلجم کت۔
آسن نین ھلی کاپٹرءِ جونءِ نزیکا أت۔ إنگت لونجان أت کہ ھلی کاپٹر رھیج گپت۔ رفتار ئی سست أت، بلے روگا أت۔ دیر نہ گوَست کہ کوھانءِ پشتا أندیم بیت۔ شت۔ "ألـّما پدا نہ یئت۔ دگہ کارے وا نیست۔ درّا کپتگین آسن إش برت۔ نین چے کن أنت؟ درّا بار دیگءِ ضرورت وا نہ إنت! پرچا بارئی دے أنت؟" ھمے ڈولین خیال میرخانءِ هوشا ترّینگا إتنت۔
چہ إیشان کہ گيش إت، یک برے پدا میرخان درّءِ چارگا شـُت۔ چارت ئی۔ چہ ھفت سرا جھلتر نہ أت۔ هفت سر کموک نه أت۔ سک پراہ أت هم۔ توکا بس لھتے آسنی ٹـکـّـر ودی إتنت۔ دگہ ھچّ چیز درا نہ أت۔
میرخان پدا کِنز إت۔ زےءِ سرا شت، جکانءِ ساھگا نشت۔ آپ ئی نہ وارت۔ دل أنگت شکـّی أت کہ بلکین آپا زھر مان بہ بیت۔
حساب ئی جت و سرپد بیت کہ إیشی چہ دیر آتکگ و إدا کپتگ۔ بمبے بیت، آسمانی سیّاروے بیت، ھرچے بیت چہ دیر دئور دیگ بیتگ۔ و چہ ھرچیز مھمتر إیش إنت کہ منی گھارزھگانءِ مَرکا إیشیا ربطے ھست إنت۔
"ھر چے إنت، ھر پیم إنت؛ نین منا یک شاھدی یے دستا کپتگ۔ سرکار ھم پٹاسگا إنت۔ أگر سرجمیا إنـّا، بلے إشاروے چہ سرکارءَ ھم دستا کپیت۔ آدگران ما وت در گیجین"۔ نین إگر دلجم نہ أت، بلے میرخانءِ دل ڈڈ بیت۔

روچتاک "ڈاہ"ءِ نمایندہ دلاور چہ دوئین ورنایانءِ مَرکا و کپتگین بمبا، بیرا، سیاروا۔۔۔ ھرچے، سھیگ بیت۔ پہ گيئشتر زانتکاریا گون میرخان دپ کپت۔ آدگہ روچا ھمراھیا جکان شت أنت۔ دلاور درّ دیست۔ عکس ئی کپت أنت۔ تھا آسنی ٹکـّر ھم ودی إتنت۔ بلے عکس إش شر در نیاتک أنت۔ فوٹوان چیزے درا بیت نہ کت۔ فایدہ نیست أت۔ درّءِ عکس بس إتنت۔ عکس و حال پہ وتی روچتاکا دلاور راہ دات أنت۔ حال شنگ بیت۔ آدگہ حالتاک و حالجاھان حال دوست بیت۔ آوان چہ "ڈاہ"ءَ زرت و شنگ کت۔ یک و دو روچا حالا چؤ جنگلءِ آسا ملک پُچ إت۔
حالءِ پاشک بیگا ملکءِ چاریگ پریشان بیت أنت۔ إیشی رازے أت، پاشک کنگی نہ أت۔ پمیشا جھد إش کت کہ خبر چدا گيئشتر چست إیر مہ بیت۔ بلے سرجمین میڈیاءِ دپا دارگ چہ آوانءِ ھَوبَتا در أت۔ مجبور بوت أنت کہ پرے مقصدا گون ملکءِ سر وزیرا دپ کپت أنت۔
چاریگی إدارہءِ دستبندیءِ پدا سر وزیرا سرجمین حالتاک و حالرسانین بنجاھانءِ سروک مُچ کت أنت و چہ آوان إے خبرا سنسر کنگءِ لوٹ ئی کت۔
چدا رند ھنچوش بیت۔ دومی روچءِ حالتاکانءِ چارگ مردما ھنچوش مارإت کہ گشیگا چشین گپے نہ بیت۔ ألبت دلاورءَ گون جگدانءِ مردمان سیادی ھست أت۔ آئی ھما دمگءِ نندوکے أت، وتی فرض ئی لیکت کہ جیڑہءِ جھلانکیا بہ رؤت و راستیا در بہ گیئجیت۔
دلاورءِ تچ تاچانءِ حال چاریگان سر بیت، گڈا شپءِ یک وھدےءَ آئیءِ لوگءِ سرا بـِیڑ إش برت۔ دلاور إش دستگیر کت و برت إش، لٹ کٹ إش کت۔ پدا سرکچ إش دات کہ إے راجی سلامتیءِ جیڑوے أت، گيئشتر پٹاسکاریءِ إجازت إیوکا چاریگان ھست أت۔ نے کہ ھر کس ناکس چست بہ بیت و ملکءِ سلامتیا خطرا دئور بہ دات۔
دلاور دلیل دات " دو بلوچ ورنا زوال بیتگ۔ ھچ کس نہ زانت پرچا، چونکا! إیشیا زانگ مردمانءِ حق إنت و حالکارےءِ جاھا منی ذمواری إنت کہ مھلوکءِ جستانءِ پسّوان در بہ گيجان۔"
أفسرا زھرا زھر گشت "چہ تو پیسر بازین حق لوٹ آتکگ أنت و شتگ أنت۔ ھنچوش کہ من گشت پہ تو گيئشتر زانگ شر نہ إنت۔ بیا إے معافی نامہءِ سرا وتی دستنشانا بہ جن پدا ما ترا یلہ کنین۔"
دلاور دلا خیالا لگّ إت "أگر من باز زؤر بہ جنان، گڈا إیشانءِ لٹ منا کشّ أنت۔ کلی کمپےءَ منا راہ دے أنت۔ رندا حال درگيجگا بل، پہ وت نہ بیان۔ آ کہ چہ کلی کمپان آتکگ أنت، آوانءِ حال ھر کسا گوَر أنت"۔
پمیشا چوکہ پنڈوکےءَ پریات ئی کت "شر منا بہ گش إت کہ إے رازءِ زانگا گون ملکءِ سلامتیا چے کار ھست؟"
أفسر زھر گپت۔ دلاورءَ دو لگت ئی جت۔ ھمے دمانا دگہ مزنترین أفسرے آتک۔ پیسری أفسر ئی چہ کوٹیا ڈن راہ دات۔ پدا دیم ئی گون دلاور کت و گشت ئی "تو سرپدین حالکارے ئے۔ ما واھوک نہ ئین کہ ترا بند بہ کنین یا لٹ کٹ بہ کنین۔ مئے خبرا بہ گر۔ کاگدءِ سرا وتی دستنشانا بہ جن۔ ما ترا پہ عزت راہ دے ئین۔ إے جیڑہءِ تھا ڈنی دست ھؤر إنت۔ پمیشا بہ زان کہ مئے خبر خشکین خبر نہ أنت۔۔۔ وتا گيئشتر لٹ مہ وارین، شرتر أنت۔۔۔ ذموارین حالکارےءِ ڈولا وتی راجی ذموا أدا بہ کن"۔
"ڈنی دست ھؤر إنت! ھان!!! منی شک راست دراتک؛ من سرپد إتان کہ پہ إے ملکا دو مردمانءِ مرگا إنچوک أھمیت نیست إنت کہ فوج، ھلی کاپٹر و جَھکا بوست بہ کن أنت۔۔۔" دلاور دلا جَوَڑ إت۔
"نین کاگدا بیار وتی دستنشانان جنان۔ نین من سرپد بیتان کہ حسـّاسین جیڑوے۔ باید من دستمانجنی مہ کنان۔۔۔ سرکچ دیگءِ منتواران۔" دلاور گشت۔
ألبت إیشی دپی توھبوے أت۔ دلا آئی أنگت قائم أت۔ گون وت عھد ئی بستگ أت کہ ھر حالتا راستیا در گيجیت و دنیاءَ ھم سھیگ کنت۔

باز روچ نہ گوستگ أت کہ ملایانءِ یک سیاسی گلےءَ مان وتی یک مچّییےءَ ملکءِ سیاستا دستمانجیءِ سببا مغربی ملک بد بلاہ گشت أنت۔ آوان گشت کہ ملکءِ واکدار مغربیان بھا زرتگ أنت و درامدانءِ لوٹانءِ پیلو کنگا سرڈگارا کارمرز کنگا أنت۔ ملک پہ مغربیان یک تجربہ گاھے جوڑ بیتگ۔ ملاوان دستگیر کنگ و بندیگ کنگءِ جیڑہ ھم آوان مغربیانءِ چکـّا جت۔ ھمے مچّیا یکـّےءَ پاشک کت کہ لھتے بمب ھم مغربی ملکان مان سرڈگارءِ لھتے دمگان دئور داتگ أنت۔ چہ بمبانءِ سببا دو شھروند شھید کنگ بیتگ أنت۔
دلاور پہ وتی روچتاک 'ڈاہ'ءَ ملاوانءِ جلسہءِ حالان نز آرگا أت۔ وھدے مغربی ملکانءِ بمب دئور دیگءِ خبر آئی إشکت، گڈا گؤش ئی لک بیت أنت۔ جلسہءِ سرجم بیگا رند دلاور تچکا ھما ملاءِ گورا شت کہ بمبانءِ حال ئی داتگ أت۔ دو پہ دو چہ آئی جست ئی کت کہ إے حال چونکا آئیءِ دستا کپتگ و بمب کجا دمگان کپتگ أنت۔ ملاءَ جگدانءِ کوھان کپتگین بمبءِ نام ھم گپت و گشت ئی کہ ملکءِ چاریگانءِ نیاما آوانءِ ھمدردین مردمان إے راز آوان داتگ۔
دلاور دوئین شھیدانءِ حالا سھیگ أت۔ آئی چؤ ھم سرپد أت کہ دوئینانءِ جانا ھچ ٹپ نہ بیتگ۔ دلا جست ئی کت "آخر إے دوئین کس چونکا مرتگ أنت؟ أگر ٹپّے پر إش بہ بیتین أت گڈا دردے دو أت۔ ٹپ وا ایشان ھچ پر نہ بیتگ! مردمانءِ جسد ھم چہ بمبءِ کپگءِ جاگها دیر بیتگ أنت"۔
دلاور چہ دیوانا چُٹّ إت۔ مچّیءِ حال ئی وتی روچتاکا راہ دات، ألبت بمبانءِ خبر ئی سنسر کت، پرچا کہ فوجیانءِ دستنشان جتگین کاگدا آئی قول داتگ أت کہ مان جگدانءِ کوھان کپتگین بمبءِ باروا ھچ نبشتہ نہ کنت۔
راز وا دلاورءَ درگیجگی أت۔ پہ وتی روچتاکا إنّا۔ پہ وتی جندءِ مردمان راستی پدّر کنگی أت۔ بازین 'تیوری' مان دلا آیگا إتنت، بلے دپ مان دپ نہ کپگا إتنت۔ چؤش کہ 'جڈ ّال'ءِ خرءِ پالاما ھر تیوری کـَرُجگا أت۔
إدا اودا باز شوھاز ئی کت۔ ملک و درملکا؛ ھرجاہ حالکارین سنگتے ھست أت ئی، جست ئی کت أنت۔ اُستمانی و میان اُستمانی حالتاک، ٹلوژن و راڈیو ئی پشت نہ گپت۔ روچ شپ بیت أنت و شپ روچ، پدا ھم چہ ھچ جاہ دلجمین پسّوے دستا نہ کپت۔ بلے أنگت دلپروش نہ أت، دلجم أت کہ روچے نہ روچے راستی دستا کپیت، پاشک إبیت، وتی ذمواریا پیلو کنت و مردمانءِ حقا أدا کنت۔۔۔

جست پد اأنگت نہ کٹتگ إتنت کہ یک روچے دلاورءَ چہ جگدان حال رس إت کہ بیا سرکاری گاڑیانءِ یک کانوائییے آتکگ، قبرستانا شتگ، ھمودا مردمان کمپ جتگ و میرخانءِ گھارزھگانءِ قبر إش پدا کوتکگ أنت۔
دلاور وتا رسینت۔ گندیت مان گورستانءَ خیمہ أنگت مکّ أنت۔ نزیکا رَوَگ مَھن إنت، کسا آنگو روگءِ إجازت نہ دیگا أنت۔ البت درا إنت که بازین مشین و دستگاہ إش گون إنت۔ جرنئٹرإش ھم گون إنت۔ پہ وت وراک وت أڈ کنگا أنت۔ شپان بتی إش ھم رؤک أنت۔ بے برقیا جگدانءِ مردم تھاروکیا زند گوازینگا إتنت، بلے إیشان راہ رواجکی کورستان شھرستانےءِ وڑا چراگان کتگ أت۔
سئمی روچ آتک۔ میتگءِ مردمانءِ تکانسریا نوک آتکگ و گورستانا وتی بنجاہ کنوکین مردم مارگا إتنت۔ أبید چہ دلاور نین دگہ لھتے حالکاران ھم سر کشـّتگ أت۔ پہ إے پھکانءِ سرکچ دیگا ضروری أت کہ کانوائییے مردم چیزے بہ گش أنت۔ پمیشا آوانءِ کماشا یک کرّا کرسییے جت، حالکارئی توار کت أنت و سرکچ ئی دات أنت کہ آ جسدان 'پوسٹ مارٹم' کنگا أنت تا مرگءِ سبب زانگ بہ بنت۔ جسدانءِ نمونہ إنگت 'کمیکلان'ءِ تھا گيئشتر سرپدی چارمی روچا دستا کپ أنت و حالکاران ھم آ سرپدی دیگ إبنت۔
چارمی روچ یک شپے دیر أت۔ زیت آتک۔ مردمان دیست کہ خیمہ پیچگ بوت۔ کالا گاڑیان لڈ ّگ بیگا أنت۔ جنرئـٹر إش ھم لڈ ّ إت۔
مردمانءِ چم جرنئٹرا سکّ إتنت۔ چے شرّین چیزے أت۔ کموکے ھیرّ ھار ئی وا کـُت، بلے چراگان ئی کتگ أت۔ بارین إنشپی چؤن إبیت۔ أبید چہ جنرئٹرا دمگ پدا تھاریا گار إبیت۔۔۔
دلاور و آئیءِ ھمدرورین حالکار پہ سرپدیانءِ زیرگا شت أنت۔ زیین مردم إش مانترّینت۔ آ مردا لھتے کاگدا بھر کت و گشت "پھکین حال إیشیءِ تھا نبشتہ أنت۔ جُستے پہ جواب دیگا ألّما پشت نہ کپیت"۔
دلاورءَ رسگا کاگد وانت۔ وانگا پد دیست ئی کہ کاگدءِ تھا ھچ نوکین خبر مان نیست۔ پیسری خبر أنت کہ 'ھچ ٹپ إش پر نیست' و گيئشتر زانتکاری ھژدری إنت، پمیشا جسدانءِ 'سمپل' پہ چارگا 'لبارٹری'ءَ راہ دیگ إبنت!
دلاور وتی جند و جگدانءِ بزگین مردم بے وس مار إت أنت۔ بے میارین بلوچ ورنایانءِ زند زوال بہ بیت و کس مہ زانت کہ کشوک کے إنت؛ إے خبر گون دلاور اوپار بیگا نہ أت۔ پمیشا أنگت کانوائے در نہ کپتگ أت کہ دلاورءَ وتا میرخانءِ گورا رسینت۔
"میرخان! أگر تو پہ دل وتی گھار زھگانءِ مرکءِ سببا زانگا واھؤکئے، گڈا چہ إیشی شرترین باریگ نہ یئت" دلاور گون دلجمین گالوارےءَ گشت۔
میرخان وتی دلگوش گور کت و جست ئی کت "بارین بہ گش چونکا؟"
چہ سرکچ دیگا پیسر دلاور جست کت "تو دگہ چار مردمءِ بند بستا کت کنئے؟ ھنچین مردم کہ پہ کشگا و مِرَگا ھم ساڑی بہ بنت! سلاح منی گورا ھست؟"
میرخان دلا فکرا لگّ إت۔۔۔ دلاور درائینت "مئے گورا باز وھد نیست إنت۔ مارا إے مردمانءِ سر بندگی إنت۔ تفنگءِ زؤرا إیشانءِ راز پچگرگی أنت۔ دیر بہ گوزیت گڈا إے چہ دستا در لکـُش أنت"۔
میرخان گون حیرانین گالوارےءَ گشت "دلاور تو وا قلمءِ واھندے ئے۔ مئیگی تفنگا چست بہ کنئے، منا شات نہ بیت"۔
دلاور سرکچ دات "إے نین پہ من یک راجی جیڑوے إنت۔ من وتا چہ راجا گستا نہ لیکان۔ ھمنچوک کہ تو إے رازا زانگ لؤٹئے دو ھمنچوک من۔ تا ھدّے کہ قلم کارمرز کنگی بیتگ، من کتگ۔ قلم کـُنڈ ترّتگ و راستی أنگت رازے إنت"۔
میرخان مارإت کہ دلاور پہ دل أت۔ پہ آئیءِ جندا ھم چہ إیشی شرترین موہ نیست أت۔ پمیشا دلاورءَ گشت ئی "تو برو سلاحان ساڑی بہ کن، من مردمان کاران"۔
زیتا زیت ششین کسان تفنگ زرت أنت و چیرکائی شیپا جھلاد بیت أنت۔ گاڑی نوکین ھمش إنت وتی إنجنان چالو کنگا إتنت۔
گاڑیانءِ راہ چپ چؤٹ و ڈل ڈؤک أت۔ تناوھدی کہ گاڑی پرّ تر مانتر بہ کن أنت، میرخان و دلاور گون ھمراھان سیاہءِ سُنٹا سر بیت أنت۔ راھا دلاور مردم سرکچ داتگ إتنت کہ چے کنگی إنت۔ سیاہءِ سنٹا بس ھمنچوک موہ رست کہ پھکان یک یکـّا جُست بہ کنت کہ سوج إش یاد أنت یا نہ۔ پنچین کسان ھَو کـُت۔
گاڑی ودی بیت أنت۔ نزیکتر آتک أنت، تیرانءِ زدا إتنت؛ کلاشانءِ توارا دیمی گاڑیءِ پرّگ تراکینگ بیت أنت۔ ألبت أنگت تیرانءِ درد گاڑیانءِ کش گورا گوارگا أت۔ ڈوکان تیر لگا إتنت، پَچک پاد آیگا إتنت۔ لھتے تیر چہ کپگا رند ھم گشیگا سٹ ورگا إتنت۔ کانوائےءِ مردم شھری إتنت۔ آوانءِ دوئین پانک کہ یک یک تفنگے گون أت إش، پگار وار إتنت۔ باز کم چشین مردم ملکا پشت کپتگ أت کہ پہ چیزے ھزار کلدارانءِ پگارا وتی جنان جنوزام بہ کنت و چکـّان چورہ۔ پمیشا پانکان تیرانءِ درد مار إت أنت و حساب إش جت کہ دیمءِ مردم باز أنت، و سلاح إش باز گون۔ سلامتی زراک نہ سرینگا گون ھمگرنچ إنت۔ دومی راہ مَرک أت۔
"تیر مجن إت۔ پدا خدائیگی بس کن إنت۔ ما بے میارین۔ مئے گورا سلاح نیست۔ ما جنگ نہ کنین۔ ھرچے مئے گورا ھست شمارا دے ئین، بلے پہ پیغمبرا بہ چار إت مارا مہ جن إت۔۔۔"۔ چہ گاڑیانءِ نیمگا توارے پریات کنگا لگ إت۔
دلاور وتی مردم إشارہ کت أنت کہ دستا بہ دار أنت۔ یکـّین إشاروا تیرانءِ توار بند بیت۔ کانوائےءِ پھکین گاڑی اوشتاتگ إتنت۔ گشیگا إیمنییے مانشانت۔ دلاور توار جت "پھک چہ گاڑیان در کپ إت؛ دستان برز کن إت؛ یک گورا، چہ گاڑیان دیر بہ اوشت إت"۔
کانوائییے مردمان کسے نیست أت کہ أبید چہ دلاورءِ حکما دگہ توجیلے بہ کنت۔ رسگا پھک گون خالیین دستان چہ گاڑیان در بیت أنت، دست إش ٹال کت أنت و دلاورءِ شون داتگین جاھا اوشتا أنت۔ چہ دلاورءِ ھمراھان دو کس درک بیت أنت و گون تفنگان آ إش أنگر کت أنت۔ دلاور وت گون یکـّےءَ گاڑیانءِ نیمگا شت أنت۔ میرخان گون دگہ کسےءَ سنگر گپت و تفنگ کنڈ مھرہ داشت أنت۔ ألبت کانوائییے مردمانءِ تھا سر پر کنگءِ ھچ ھاٹی پشت نہ کپتگ أت۔ آ پھک سرانءِ خیرا لوٹوک إتنت۔
دلاور گاڑی سر چیر کت أنت، ھر کاگدے کہ ھست أت، زرت أنت۔ پدا دیم پہ سنگرا شت۔ وتی سلاحبندین ھمرائی پدا توار کت أنت۔ کانوائی ئی روگا إجازت دات۔ کانوائی رھیچ گپت، آ ھم چہ سنگرا درکپت أنت و دیم پہ جگدان راھی بیت أنت۔
اودا دلاور سرجمین تاک وانت أنت، چارت أنت، سرکچ وارت أنت و پدا إیشانءِ ضروری نقطہ پہ مردمان بلوچیءَ بیان کت أنت۔
چدا پد دلاور شپی شپ گچینی بھر نز آرت أنت و دیم پہ شھرا شت۔ اودا نز آرتگین کاگد ئی گون شاھدیان میان اُستمانی حالجاہ، حالتاک و حالرسان إداروانءِ سرا 'فکس' کت ئنت۔ دومی روچا دیناءِ بازین حالتاک چہ 'کلاسیفائڈ' حالان پر إتنت۔ إیشانءِ سرحال أت "جنـئـٹک سلاحءِ أڈ کنگا دیمروی"۔
سرجمین حالءِ لھتے رد چوش إتنت "مغربی ملکےءِ کوّاس و یک پدمنتگین إیشیائی ملکےءِ فوجءِ ھؤرکاریا کروڑان ڈالرءِ خرچا أڈ کتگین 'جنئٹک' گئس کامیابیا چکـّاسگ بیت۔ چہ بزگین ملکءِ فوجی بنجاھےءَ دئور داتگین جنئک کئس بروکین بمبےءِ تراکینگءِ سببا دو کس بیران بیت أنت"۔
جنئٹگ سلاحءِ سرا تبصرہ کنگا سائنسی تاکبندےءَ نبشتہ کتگ أت "جنئٹک گئس کروز میزائلے سرا لڈگ و یک شھرےءِ سرا أگر دئور دیگ بہ بیت، گڈا ھما 'جین' کہ أصلی ھدف به بیت إیشیءِ آماچ إبیت؛ بزان إیشیءِ بو آوان کـُشیت۔ شھرا نندوکین آدگہ مردمان گـَرَز نہ بیت۔ ھدف ھر ڈولین جاندار بیت کنت۔ چدا پیسرا جنئٹک گئس مشک و شادیانءِ سرا چکاسک بیتگ"۔
دیمترا گيئش کنگ بیتگ أت "ذکر بیتگین چکـّاسءِ ھدف مان یک میتگےءَ نندوکین ھنچین مردم بیتگ أنت کہ آوان گون یکـّا دگرا نزیکین سیادی ھست۔ پیسرا چه میتگءِ مردمان گپتگین 'ڈی إن إے' دیم په دیم کنگ بیتگ أنت کہ یکـّین 'جین'ءِ مردم ثابت بیتگ أنت۔ ألبت دئور داتگین کروز ٹکین جاگھا نہ کپتگ، پمیشا مرتگین مردمانءِ حساب کم إنت"۔
"زانان بزگین مرواردءِ بھت نزورتر بیتگ۔ پمیشا آئی بچ مان آ کوہ بُنا إے شمین گئسءِ آماچ بیت أنت"۔ حالا وانگءِ درگتا دلاورءِ دلا خیال آتک۔
Hoo Pada Hore Gowreth Mah Wathi Zamenan Keshen MAsh O Parmash Beth Dunya o Jehan e Murrg Kayanth Ksse Balle Nadanth Kase Hech Hum Nagosheth Par Cha K Ae MAni Zamen Anth Aeshe MAlik Man wathan........................................