Author Topic: . تَرینـــــــــــوک : کریم بلوچ _ تـَهل . چـُـکانی دیوان آلفونس دوده  (Read 2483 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture

چـُـکانی دیوان آلفونس دوده
---------------- -----------------
تَرینـــــــــــوک : کریم بلوچ _ تـَهل

گـُـڈی ئیں دَر ( درس )

آ روچین منی وانـگـجـاه ءِ رَوَگ سَک دیر بـیـتـگ ات . من تُرستاں که مئی استاد واجه « هامل » منا میاریگ بکنت . روچ مئی چـَـکـّـاس ءِ روچ ات و من چیزے دَر نبُرتگ ات . من پگر کت که وانگجاه ءَ مه رواں گهتر انت .
گرمیں روچے ات ، زوراکیں واکاں ، مئی ملک ءَ چیر جـَـتـَگ و وَتیگ کـُتگ ات و شهر ءِ پراهیں پـَـڑ و هـَـنـدِے ءَ هنون وتی پـَئـوجی چـِست و ایراں گـُلائیش اتنت . من پدا گوں دل تـَپـَرکـَهی ، وانگجاه ءِ نیمگ ءَ تـَچان بیتاں . وهدے که شهر ءِ مزنیں شـَهدَگّ ءَ رَستاں ، بازیں مردُمے من دیست که گوں نبشتگیں کاگدانی دارگ ءَ ، اے نیمگ و آ نیمگ روان اتنت . ادان هما هـَند ات که جَنگ ءِ هالاں هردمان ءَ شِنگ و تالاں بَیـَگ اتنت . من پگرے ءَ بـُـڈاتاں که چون بارین اے بَرین چے بیتگ ؟
وَهدِے که وانگجاه ءَ رَستاں ، تـُسـتـَـگ و ژَند بیتگ اتاں . مئی گـُڈی ئیں دَر ( دَرس ) ءِ بُنگیج ات . من پگر کت که بـَلکین چـُپی ءَ ،وهدے که هَنگت درس بنگیج نبوتگ ، وتی کـَلاس ءِ کوٹی ءَ مان به بیاں . هَنچو که اُستاد منی دیر آیگ ءَ سرپد مه بیت . بلے من سرپد بیتاں که اے روچ چه سرجمین روچاں چُپ تر انت . تُرس و بَژن ءِ تَهلیں ساهِگے مانشانتگ ات . من هـُجّ و مَجبور بیتاں که دَروازگ ءَ پاچ کناں و کلاس ءَ مان به بیاں ، بلے من بِه مَنتگ و هـَبـَـکـّه بیتاں که استاد هامل ءِ چارگ و توار ءَ هِچ هِژم و میارباری اے مان نیست ات . تهنا منی گوئشت : زوت تر وتی هَند ءَ به نند ، یک کمے هست ات که بے تو ، گـُـڈی درس ءَ بنگیج کنون .
هر چیز هیرانی و بــِهمانگی ات . واجه هامل ءَ وتی شونزیں کوٹ ءَ که تهنا وتی وَشّی و راجی روچاں گـُـوَرا کنگ ات ، گورا کتگ ات . وانگجاه ءِ وانوک پهک بژنیگ اتنت و منی هَیرانی هما وهد گیش بیت که من کلاس ءِ آهری رِداں چارت و گوں وتی چماں من دیست که آهری رِد هم چه کـَلـّـَـگی وانوکاں ، که پَهک دیم تهار و بَژنیگ اتنت پُر بیتگ ات .
استاد هامل ءَ وتی گـَپ گوں نرمی ءَ بنگیج کت انت : منی دوستیں زَهگاں ، اے منی گـُڈی روچ انت که من شما را وانیناں . چه « برلین » ءَ نوکیں دَستورے آتکگ که چـِـد و رَند ، سرجمیں وانگجاهاں تهنا جرمنی _ آلمانی _ زبان وانینگ به بیت .
بزان مَرچی گـُڈی روچ انت که شما وتی ماتی زبان ءَ ، بزان پرانس ءِ زبان ءَ وتی وانگجاهاں وانگ ات .
بزان اے مئی گـُـڈی درس ات که وتی ماتی زبان ءَ وانگ اتیں و من هـَنـگـَت جوانی ءَ نبشت و وَنت نه کت .
من سک بژنیگ بیتگ اتوں که پرچا تا هنون وتی ماتی زبان ءِ دَربَرگ ءِ بَدل ءَ ، تـَـرّ و گـَرد ءِ رَندا کـَپتـَـگ اتوں . هما کتاب که چـِد و پیش من چه آهان ژند بیتگ اتوں و پمن بیکار اتنت ، هنون باز دلدوست بیت انت . چه ایش که چد و رَند من واجه هامل ءَ نه گِند اوں ، هم زَهیریگ بیتاں و آئی ءِ سرجمیں میارباری و گـَرمسَری شموشت انت .
هـَـو ، واجه هامل ءَ وتی گـُـڈی درس ءِ وانینـَـگ ءَ په ، وتی گـِـهتِریں دِرِیس و گـُـداں گورا کتگ ات ، کـَـلـّــَـگی وانندهاں گوں بَژنیگیں دلے آتکگ انت تا وتی پَشومانی ءَ پَدَر بکن انت که پرچا چـِد و پیش وتی شیرکنین ماتی زبان اش نه ونتگ و درنبرتگ ات .

* -
آلفونس دوده ( 1897 - 1840 م .) پرانس ءِ چه مَزنیں ندکاران انت که په کسانیں آزمانکانی نبیسگ ءَ باز نامدار انت .
آلفونس دوده باز راجدوست و ماتی زبانانی اهمیت ءِ مَـنّـوک و پَدَر کنوک انت . هر راجے ءَ وتی هستی هست انت که زبان ، دود ربیگ و ... هرکجام اے هستی ءِ بهرے انت و هر راجے ءِ پَهرانی روشنیں پَدَرے .
« گـُڈی دَر » آلفونس دوده ءِ یکے چه جوانیں کسانیں آزمانکاں انت
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line