بتل:
" آئرا وشھال کس ءَ نہ دیت کہ کٹّی نوزدہ ءُ ھرچی بیست " .
آ مردم کہ ھرچی چہ آمدنی ءَ گیش بہ بیت ھچبر وشھال نہ بیت ءُ آئی کہ کٹّی نوزدہ ءُ ھرچی بیست بہ بیت آ سرجمیں زند ءَ وامدار ءُ پریشان بیت بزاں چہ زند ءِ گَلگ ءَ پشت کپیت ءُ اڑ ءُ جنجالانی آماچ بیت .
ھر کس زانت کہ بے زرّ ءُ مال ءَ دنیائی زند ءِ گوازینگ نہ بیتگیں گپّے .
اے بتل ترا ھرچ ءَ چہ آمدنی ءَ کم کنگ ءِ سُکین ءَ دنت ءُ پیش دارایت کہ وتی سرجمیں کَٹّ ءَ یکپارگی مہ چَٹّ بلکیں " پُگے بور ءُ پگے پہ لُنٹاں مُش " بزاں پہ دیمءِ آیوکیں سکّیں روچاں چیزے ایئر بکن . اشی ءِ مانا بھیلی یا کنجوسی نہنت . اگہ اللہ ءَ ترا باز داتگ باز بور بلے یاد بکن کہ تئی ھرچ ءُ آمدنی ھمکیل یا گیش مہ بیت .
بلوچی بتل زندمان ءِ نمیرانیں مڈّی انت اگہ آیانی سرا عمل بہ بیت ما ھچبر ءُ ھچّ جاہ کم نیارایں ءُ زند ءِ ھرپڑا سوبین بیں . امید انت کہ ھنچش کن ات .
کزوری پہرہ .
