استاد اشرف سربازیءِ شئرے
روچے که من تو یارتیں
یک دومیءَ گموارتیں
مهرءِ زرءَ گم گــارتیں
دل پہ دلءَ بے سارتیں
هر چے که تو واهارتیں بے مهتلی من بیارتیں ۔
نوں آ دماناں تو شموش
آ پیشی تراناں تو شموش
عهد ءُ کراراں تو شموش
پلیــں نیاداں تو شـــــمـوش
وهدےکه دل پلگارتیــں روچے که من تو یارتیں ۔
یل دات عالم من تمــام
هم دین ءُ هم دنیا ءُ نـام
بوتاں تئی دُرگوشیں گلام
تهنا ستـــــا انت تئـــی مدام
تئی گرستے من مارتیں روچے که من تو یارتیں ۔
سر شت منی بیگواه بوت
بازیناں زار ءُ واه بــوت
نئی که ترا پرواه بـــوت
شکراِنت تئی جنددْراه بوت
دائم وت ات گیمارتیــں روچے که من تو یارتیں ۔
نوں که پرنگءَ نشتگاں
هر چیزےءَ سر گْوستگاں
لجّءِ دسگ من سستگاں
البت که تو پِــر بستگــاں
موجیں دل ات پلگارتیں روچے که من تو یارتیں .
نوں بے منیگی شرتـرئے
هر کاریء تو گهــترئے
زندءِ گـــراں زانـو گرئے
پیش چہ اشی که هوژّ گرئے
آ دوشی ات هم مارتیـں روچے که من تو یارتیں ۔
اُستاد اشرف سربازی
____________
گوں مساپر بلوچ ءِ منہ واری ءَ