وشين واب سلامتين جان
يك شپي من و پتگ اتان ، شپءِ اولي پاس ات . مني وابءَ يك جنين آدمي اتك . بلي جنين آدمءِ شلوار سبزءُ پشك سياه ات. من جنين آدمءَ را جُست كت. ماتي تئي شلوار سبزانتءُ تئي پشك سياه انت ، جنين آدمءَ درّائينت مني زهگ؟ مني شلوارءِ سبزي ءُ سياهي ءَ تو سرپد نه بئي ، من ترا رندءَ سرپدكنان ، بلي بيا مني همراه بَي ، من ترا دنياءِ شرءُ گندگان پيشداران . منءُ جنين آدم سر په رند بيتانءُ شتان. يك كهيريءِ چيرءَ جنين آدم اوشتات. من جنين آدمءَ را جُست كت. ما تي اي كهيرءِ يك نيمگي هشك انتءُ يك نيمگي ترّانت؟ جنين آدمءَ گُشت ، انگت ديما برين ، ديمترا ماشُتين دانكه يك نريان يي بهاراني تهابستگ ، بلي نريان هُشك هُشك انت چو سُروزءَ تاب گپتگ؟ من جنين آدمءَ را جُست كت ماتي اي نريان پرچه چوتاب گپتگ؟ جنين آدمءَ گُشت ، انگت ديما برين. دگه جاگهي ماشُتين دانكه دو مردم انت ، درياءِ ، شلنچگا انت. من جست كت ماتي اي چونين مردم انت، كه درياءَ شلنچگا انت. جنين آدمءَ منءَ پسّه نه دات. انگت ديما برين ، ايشيءِ معناءَ من ترا رندءَ سرپدكنان. ديمترا كه ماشُتين چاران ، دانكه چار مردم انت نشتگ انت ، يكيءِ ديم شغربءَ انت ، يكيءِ ديم مغرب ءَانت، دگه يكيءَ ديم جنوبءَ انتءُ يكيءِ ديم شمال ءَانت. من جنين آدمءَ را جست كت ، ماتي! اي چونين مردم انت. جنين آدم ءَگُشت : ايشاني معناءَ هم ترا رندءَ گُشان . انگت ديما بچار، چي چي تئي ديما كئيت ، بلي هچ مه گُش ، چمّان پچ كن بچار، پداما رهادگ بيتان ، دگه يك جاگهي شتان دانكه چار جنين آدم انت. هرچارين ، يكين تاليءِ تهاورگ ، ورگا انت. منءَ صبرءَ نه اشت. من پداجُست. كُت ماتي! اي چونين مردم انت، جنين آدمءَ گُشت ، منءَ انچو جست مكن ، بس مني همراه بَي بچار. انگت ديما برين ، چي چي نه گندئي . كمين ما كه ديما شُتين ، دانكه چارچمچ انت، يك كوريءَ دستءَ گپتگ انت. منءَ پدا صبرءَنه اشت. من جست كت ماتي! اي چونين مردم انت كه چار چمچچ يك كوريءَ دستاگپتگ؟ جنين آدمءَ من ءَگُشت، انگت ديما برين. ما پدا ديمتراشيتن، دانكه يك بلاهين شيري ، وپتگ . آئيءَ را روبا لگتمال كنگا انت. شيرءَ موري مان گوشءَ نه وارت. منءَ پدا صبرءَ نه‌اشت من جُست كت، ماتي اي چونين شيري كه ايشيءَ را روبا لگتمال كنگا انت، اي بلاهين شير هچ نه گُشيت. منءَ پسّه‌ي نه دات، گشتي انگت ديما برين ،كمين پداما ديمترا شتين، دانكه برّيي و رنا انت ذگرين روچءِ سرءَ نشتگ انت، من جُست كت، ماتي اي چونين ورنا انت؟ اي ذگرين روچءِ سرءَ جان دراءَ نشتگ انت؟ منءَ پداپسه اي نه دات. انگت ديما برين ما پدارهادگ بيتان ءُگزلي راه ءَشتان ، دانكه دگه جاهي مئي سركپت ، يك چك ئي و تي پتءَ په شهمات جنگا انت. پدا منءَ اوپارنه شُت. من جُست كُت ، پدا منءَ پسّه اي نه دات، انگت ديما برين . مادگه جاگهي شتين، دانكه يك مردي يك جنين آدم يي اَنگران كتگءُ دگه چار ورناهين بچ انت آنزاره چارگءَ انت. بچاني مات انگران كتگ ، بچ گوشان نه تاپيننت. من جُست كت، ماتي ني منءَ المءَ بگُش كه ني آپ چه سرءَ پرگوستگ، ني منءَ هچ ورا برداشت نه بيت ، من په همي چارين بچان گُشت، اد‌طي بي گيرتان شما لج يي په بها بزورات ، شمئي مات اي ظالمان انگران كتگ، شمئي چم پچ انت شما چارگ‌ات . اي بي گيريتن بچان منءَ هچ پسّه نه دات، جنين آدمءَ منءَ گُشت، بيا مني زهگ ني من تئي جُستاني پسّهءَ ديان كه تو ديرانت گون من همراه ئي، تو منءَ جُست كنئيءُ من تراگُشان صبر كن. ني بامءَ داتگ ، ني بيا مني ديمانند كه من تئي دراهين جُستاني پسّوءَ تراديان. بلي اي مان گشتگين حساب انت، ايشان پچ كنگ لوتيت . مني كلوهان مني دراهين بچان سربكن ، مني بچان بگش چوبي گيرتءُ لگورمه بئت . وتي ماتءَ چه بنديءَ بوموك اِت كه منءِ سك ديرانت كه من بندي جاهءَ بندان.
پسّو 1ـ شلوارءِ سبزي؟ شمئي سرزمين انت. شمئي سرزمينءِ چيرءَ مزنين مالءُ مدطّي يي است. ايشاني كشّگءُ زاهر كنگا مزنين جهدي لوتيت.
پسّو 2ـ پشكءِ سياهي؟ شمئي سرزمينءِ برزي تبكءَ هچ گندگ نه بيت، بلي تها مالءَمال انت.
پسّو3ـ كهيرءِ يك نيمگي هُشك انت دومي نيمگ سبزانت؟ اين نيمگ كه سبزانت، اي نيمگ گيسءُ تيل انت؛ دومي نيمگ كه هُشك انت، آنيمگءَ زرّءُ سُهرانت.
پسّو 4ـ نريان كه بهارءِ تها بستگءُ انگت نريان هُشك انت، لاگر لاگر انت؟ اي شمئي راج انت كه اي گنجين مالءُ مدطّيءِ ميانءَ انگت بلوچ راج وراءُ عذاب انت.
پسّو 5ـ اي دوئين مردم كه درياءَ شلنچگا انت؟ اي تپاكي انت، اگن دو مردم تپاك به بيت، دريا په شلنچگاهم هُشيت.
پسّو 6ـ اي چارين مردم كه يكيءِ ديم مغربءَ، يكيءَ ديم شغربءَ، دگه يكيءَ مان جنوبءُ شمال ءَانت؟ اي ناپتاكيءُ بي مهري انت. يكين لوگءِ مردم هم تپاك نه انت، هر كس دوميءِ سرءَ زهرانت، كس كسءِ سرءَ وش نه انت.
پسّو 7ـ اي چارين جنين آدم كه يكين تالءِ تهاورگ ، ورگاانت، اي تپاكي انتءُ رزكءِ بركت انت.
پسّو 8ـ چار چمچچ يك كوريءَ دستءَ گپتگ انت؛ اي چارين چمچچ مرچگين دهرءِ عالمءُ زانتكار انت كه يك جاهليءَ دستءِ شكارانت، زاننت ، بلي په كسّت پادءَ پِردينت.
پسّو 9ـ اي شير كه وپتگ روباي لگتمال كنگا انت ، شيرءَ موري مان گوشءَ نه وارت؟ اي شيرتئي چوت بروتين بلوچ انت كه آهانءَ زحمءِ تپ هم كار نه كنت.
پسّو 10ـ اي ورنا كه ذگرين روچءِ سرءَ جان دراءَ نشتگ انت؟ اي مرچيگين دهرءِ ورنا انت كه گون سلّين كاران دست گلائش انت.
پسّو 11ـ اي چُك كه وتي پتءَ شهمات جنگا اِنت، اي مرچيگين دهرءِ او بادگ انت كه بزرگاني هچ عزتءُ احترامءَ نه كننت، هر كس و تارا يك ديهي ليكيت ، كس كسّيءِ پرواهءَ نه داريت.
پسّو 12ـ اي مردءَ كه اي جنين آدم انگران كتگءُ بچ‌ي نشتگءُ چارگا انت؟ اي شمئي ماتين وطن انت كه دستءِ ظالمان انگران انت، شمئي چم پچ انتءُ شما چارگا ات، ني شما را هر چي دِل پرمائيت هما بكن اِت
بلوچ
http://www.balochistaninfo.com/zobane%20balochi/vashen%20vab1.htm
